NATO üzvü olan Avropa ölkələri alyansın qüvvələr modelinə ABŞ-nin töhfəsinin azalmasını artıq qismən kompensasiya edib və qalan boşluqların aradan qaldırılması istiqamətində işlər davam edir.

"Report"un Avropa bürosu xəbər verir ki, bunu NATO-nun baş katibi Mark Rütte Brüsseldə alyansa üzv ölkələrin müdafiə nazirlərinin iclasından əvvəl jurnalistlərə açıqlamasında bildirib.

Daha əvvəl Vaşinqton müttəfiqlərini NATO-nun qüvvələr modelinə – dövlətlərin alyansa təqdim etməyə hazır olmalı olduğu qüvvə və vasitələri müəyyənləşdirən hərbi planlaşdırma sisteminə öz töhfəsini azaltmaq niyyəti barədə məlumatlandırmışdı.

Rüttenin sözlərinə görə, ABŞ-nin iştirakının azalması Birləşmiş Ştatların eyni vaxtda bir neçə strateji istiqamətdə öhdəliklərini nəzərə almaq zərurətindən irəli gəlir.

O vurğulayıb ki, NATO-nun qüvvələr modeli ilk növbədə planlaşdırma alətidir və silahlı münaqişə baş verəcəyi təqdirdə müttəfiqlərin addımlarını avtomatik olaraq əks etdirmir.

"Müharibə başlayacağı halda bütün müttəfiqlər, o cümlədən Birləşmiş Ştatlar mövcud imkanlardan maksimum dərəcədə istifadə edəcəklər", - o bildirib.

Baş katib əlavə edib ki, ayrı-ayrı istiqamətlərdə müəyyən işlərin aparılması zəruri olsa da, alyans "yaxşı vəziyyətdədir".

Oxşar xəbərlər

Rutte: Ukraynanın NATO-ya gedən yolu açıqdır

NATO-nun Baş katibi Ukraynanın nə vaxt alyansa üzv olacağını bilmir

NATO-nun Baş katibi Avropa İttifaqı ölkələrinə xəbərdarlıq edib

NATO ölkələri müdafiə nazirlərinin iclası iyunun 18-də Brüsseldə keçiriləcək

Mark Rütte: NATO müttəfiqlərinin müdafiə xərclərini artırıb