Mədəniyyət və İncəsənət Televiziya Efirindən Sürgün Edilib

Hörmətli oxucular, aidiyyəti qurumlar və media nümayəndələri,

Son illərdə Azərbaycanda yayımlanan televiziya proqramlarının səviyyəsi, cəmiyyətin intellektual və estetik ehtiyaclarına cavab verməkdən uzaq düşüb. Bir vaxtlar – xüsusilə 1990-cı illərin sonları və 2000-ci illərin əvvəllərində – milli televiziyamız mədəniyyətin, maarifçiliyin və incəsənətin güzgüsü idi. O dövrlərdə efirə savadlı ziyalılar, tanınmış sənətkarlar, ədəbiyyat və musiqi xadimləri dəvət olunurdu. Proqramlar təkcə əyləndirmir, həm də düşündürür, estetik zövq formalaşdırırdı.

Bəs indi nə görürük?

Efir boşluqları qalmaqallarla, səviyyəsiz və kobud zarafatlarla, şəxsi həyatın ictimailəşdirilməsi ilə doldurulur. Gündəmin mərkəzində sənət yox, şayiələr və sosial şəbəkə populyarlığı dayanır. Mədəni dəyərlərin, klassik ədəbiyyatın, musiqinin, teatrın, rəssamlığın, folklorun ekrandan sıxışdırılıb çıxarılması cəmiyyət üçün sadəcə estetik yoxsulluq deyil, həm də sosial təhlükədir.

İncəsənət adamları haradadır?

Niyə teatr rejissorları, şairlər, bəstəkarlar, rəssamlar, sənət tənqidçiləri efirə dəvət olunmur? Onların fikrinə, sənətinə və təqdim etdiyi dəyərlərə niyə yer verilmir? Əvəzində saatlarla reytinq dalınca qaçan, lakin cəmiyyətə mənəvi və intellektual heç bir qatqısı olmayan sosial media simaları televiziya ekranlarını zəbt edib.

Bu təkcə televiziyanın problemi deyil...

Bu vəziyyət bütöv bir cəmiyyətin mənəvi gələcəyini təhdid edir. Çünki efirdə gördüyünü həyat nümunəsi olaraq qəbul edən gənc nəslin zövqü deformasiya olunur, səviyyəsizlik normaya çevrilir, savadsızlıq isə qəhrəmanlaşdırılır. Mədəniyyət və incəsənət efirdən çəkildikcə, onların yerini səthi və keyfiyyətsiz kontent tutur.

Cavabdehlər kimdir?

Buradan məsuliyyətli qurumlara – Milli Televiziya və Radio Şurasına, Mədəniyyət Nazirliyinə, eləcə də ictimai və özəl televiziya rəhbərlərinə səslənirik: bu gedişata nə vaxt müdaxilə olunacaq? Milli dəyərləri yaşadan, təbliğ edən, gənc nəslə örnək ola biləcək proqramların bərpası üçün nə vaxt addım atılacaq?

Biz səssiz qalmamalıyıq

Bu məsələ yalnız mədəniyyət və incəsənət adamlarının deyil, hər bir vətəndaşın, hər bir valideynin, müəllimin, ziyalının problemidir. Cəmiyyət olaraq səsimizi ucaltmalı, efirdə mədəniyyətin, ədəbiyyatın, musiqinin, düşüncənin yer almasını tələb etməliyik. Televiziya – əgər məqsədyönlü şəkildə istifadə olunarsa – çox güclü bir maarifləndirmə vasitəsidir. Amma hazırkı vəziyyətdə bu vasitə, təəssüf ki, cəmiyyətə zərər verir.

Zaman mədəniyyətin müdafiəsi üçün birlik zamanıdır. İncəsənət efirə qayıtmalıdır!

[Sizinxeber.Az Baş Redaktor Izzət Qurbanov]