Azərbaycanda qida istehsalı və ərzaq təhlükəsizliyinin təmin edilməsində əsas yük özəl sektorun üzərinə düşür.

"Sizinxeber.az"un Zəngilan rayonuna ezam olunmuş əməkdaşı xəbər verir ki, bunu kənd təsərrüfatı naziri Məcnun Məmmədov "Azərbaycanda kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı" ilə bağlı keçirilən müşavirədə bildirib.

Nazirin sözlərinə görə, ölkədə kənd təsərrüfatı məhsullarının istehsalı, emalı, qida sənayesi və aqrar dəyər zəncirinin fəaliyyəti əsasən özəl sektor tərəfindən həyata keçirilir.

"Azərbaycanın kənd təsərrüfatı istehsalı, qida istehsalı, ərzaq təhlükəsizliyi və aqrar dəyər zəncirinin fəaliyyəti faktiki olaraq 100 % özəl sektorun hesabına təmin olunur. Prezident İlham Əliyevin son müşavirədə investorlara və sahibkarlara ünvanladığı çağırış da məhz özəl sektorun aqrar sahənin inkişafındakı mühüm rolundan irəli gəlir", - deyə nazir vurğulayıb.

M. Məmmədov qeyd edib ki, qarşıdakı dövrdə aqrar sahənin inkişafı üçün dövlət və özəl sektor arasında əməkdaşlığın daha da gücləndirilməsi, investisiyaların artırılması və müasir istehsal yanaşmalarının geniş tətbiqi xüsusi əhəmiyyət daşıyacaq.

Nazir həmçinin vurğulayıb ki, Azərbaycanda aqrar sektorun inkişafında yeni yanaşmalara ehtiyac yaranıb: "Ötən il kənd təsərrüfatının ölkənin ümumi daxili məhsulunda payı 5,9 %, qeyri-neft ÜDM-ində isə 8–10 % təşkil edib.

Kənd yerlərində yaşayan əhalinin təxminən yarısı bu sahədə çalışsa da, son illərdə sektorda orta illik artım cəmi 1 %-ə yaxın olub. Uzun illər kənd təsərrüfatında artım əsasən əkin sahələrinin genişləndirilməsi hesabına təmin edilib. Əlavə torpaq sahələrinin əkin dövriyyəsinə cəlb olunması istehsalın artmasına imkan yaradırdı. Lakin bu yanaşma artıq öz potensialını demək olar ki, tükədib.

Bundan sonra inkişafın əsas hərəkətverici qüvvəsi məhsuldarlığın artırılması, müasir texnologiyaların tətbiqi və daha səmərəli istehsal modelinə keçid olmalıdır. Hazırda aqrar sektorun qarşısında torpaq sahələrinin kiçik və pərakəndə olması, su təminatındakı çətinliklər, iqlim dəyişikliklərinin təsirləri, kadr çatışmazlığı, eləcə də məhsuldarlığın mövcud potensialdan aşağı səviyyədə qalması kimi ciddi çağırışlar dayanır", - deyə nazir vurğulayıb.

Oxşar xəbərlər

Zəngilanda aqrar sektorun inkişafı müzakirə olunur

Vahid Hacıyev: "Aqrar sektorda istehsal və emal imkanları genişləndiriləcək"

Azərbaycanda aqrar informasiya-məsləhət sistemi formalaşdırılacaq

Zeynal Nağdəliyev: "Aqroparkların yaradılması bəzi kənd təsərrüfatı məhsulları üzrə idxaldan asılılığı aradan qaldıracaq"

Son 10 ildə Azərbaycanda aqrar sektor təxminən 38 % böyüyüb