Azərbaycanda müasir suvarma sistemi olmayan yeni əkin sahələrinə icazə verilməyəcək.

"Report"un Zəngilan rayonuna ezam olunmuş müxbiri xəbər verir ki, bunu kənd təsərrüfatı naziri Məcnun Məmmədov "Azərbaycanda kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı" ilə bağlı keçirilən müşavirədə deyib.

Onun sözlərinə görə, gələcəkdə yeni əkin sahələrinin istifadəyə verilməsi zamanı müasir suvarma sistemlərinin qurulması əsas tələb olacaq: "Suvarma infrastrukturu yaradılmadan və müasir suvarma tətbiq edilmədən əkin sahələrinin istifadəsinə icazə verilməyəcək. Müasir suvarma bizim üçün olmazsa-olmaz şərtdir. Bu yanaşma mərhələli şəkildə ölkənin bütün ərazilərində tətbiq olunacaq və su infrastrukturunun inkişafı ilə paralel həyata keçiriləcək. Gələcəkdə dövlət dəstəyi mexanizmlərində də müasir suvarma sistemlərindən istifadə edən təsərrüfatlara üstünlük veriləcək. Subsidiya Şurasının son qərarına əsasən, Naxçıvanda müasir suvarma tətbiq edilən əkin sahələri üçün hər hektara əlavə 150 vahid subsidiya müəyyən olunub. Bu fərq gələcəkdə daha da artırılacaq və ölkə üzrə geniş tətbiq ediləcək".

Nazir əlavə edib ki, məqsəd su itkilərinin azaldılması, su resurslarından səmərəli istifadə və kənd təsərrüfatında məhsuldarlığın artırılmasıdır.

Oxşar xəbərlər

Azərbaycanda 130 min hektar sahədə müasir suvarma sistemləri yaradılıb

KTN: Azərbaycanda kənd təsərrüfatı bitkilərinin məhsuldarlığını 2-3 dəfə artırmaq mümkündür

Azad Cəfərli: "120 min hektar ərazidə müasir suvarma sistemi quraşdırılıb"

Nazir: "Qarabağda 14 min hektara yaxın kənd təsərrüfatı torpağı investorlara verilib" – EKSKLÜZİV

Məcnun Məmmədov: "Torpaqların konsolidasiyası qapalı suvarma şəbəkəsi ilə su təminatı layihəsidir"