Son beş ildə Azərbaycanın ticarət və nəqliyyat əlaqələrinin ən sürətlə inkişaf etdiyi region məhz Mərkəzi Asiyadır.

"Report" xəbər verir ki, bunu iqtisadiyyat naziri Mikayıl Cabbarov İslam İnkişaf Bankı (İsDB) Qrupunun 51-ci İllik Toplantıları çərçivəsində "Azərbaycan ev sahibi və əlaqələndirici kimi: yaşıl transformasiya, regional inteqrasiya və strateji tərəfdaşlıq" mövzusunda Müdirlər Şurasının sədri ilə dialoq sessiyasında deyib.

Onun sözlərinə görə, Azərbaycan regionda Mərkəzi Asiya ölkələri ilə əlaqələri vahid iqtisadi ekosistemin tərkib hissəsi kimi qiymətləndirir: "Azərbaycanın Qazaxıstan, Özbəkistan və Qırğızıstanla üç aktiv investisiya fondu fəaliyyət göstərir. Bu fondlarda Azərbaycanın payı müvafiq olaraq 50 %, 75 % və 100 % təşkil edir. Biz həm dövlət, həm də özəl sektorun bu ölkələrə investisiyalarını təşviq edir, eyni zamanda həmin ölkələrdən sərmayələrin cəlb olunmasına açıq olduğumuzu nümayiş etdiririk".

O bildirib ki, Azərbaycan enerji və mineral resurslarla zəngin Mərkəzi Asiya ölkələri üçün Orta Dəhliz üzərindən Qərbə çıxış təmin edən təbii qovşaq rolunu oynayır: "Azərbaycan yalnız yük daşımalarının deyil, ideyaların və innovasiyaların da hərəkəti üçün regional platformaya çevrilmək niyyətindədir. Bu gün əlaqəliliyin yeni formalarından biri məlumat mərkəzləri, telekommunikasiya, məlumat ötürülməsi və süni intellekt sahələrində əməkdaşlıqdır. Azərbaycanın coğrafi mövqeyi bu istiqamətlərdə regional əməkdaşlığın genişlənməsinə imkan yaradır".

Nazir əlavə edib ki, ölkə həm İsDB platformasında, həm də ikitərəfli formatlarda üzv dövlətlərlə əməkdaşlığı daha da dərinləşdirməyə çalışır.

Oxşar xəbərlər

Mikayıl Cabbarov: "Qarabağın bərpasına ÜDM-in 3 %-i qədər yatırım edilir"

Mikayıl Cabbarov: "İsDB ilə əməkdaşlıq Azərbaycanın inkişafında mühüm rol oynayıb"

Nazir: "İsDB Azərbaycan üçün təkcə maliyyə deyil, həm də strateji tərəfdaşdır"

İqtisadiyyat naziri: "Layihələr mərkəzləşdirilmiş yanaşma üzərində qurulmamalıdır"

Nazir: "Sənayeləşmə və yüksək əlavə dəyərli xidmətlər iqtisadiyyatın hərəkətverici qüvvəsi olacaq"