Regional enerji bağlantıları və elektrik enerjisi ticarəti Tacikistan üçün strateji əhəmiyyət daşıyır.

APA xəbər verir ki, bunu Tacikistan maliyyə nazirinin birinci müavini Yusif Məcidi İslam İnkişaf Bankı Qrupunun (IsDB) illik toplantıları çərçivəsində keçirilən “Davamlı İnkişaf üçün Regional Enerji Bağlantıları” mövzusunda panel müzakirəsində deyib.

O bildirib ki, enerji təhlükəsizliyinin təmin edilməsi Tacikistanın 2030-cu il Milli Strategiyasında əsas hədəflərdən biri kimi müəyyən olunub:
“Tacikistan üçün milli enerji təhlükəsizliyi ilə regional bağlantılar və elektrik enerjisi ticarəti bir-birinə zidd deyil. Əksinə, onlar bir-birini tamamlayır”.

Məcidi qeyd edib ki, ölkənin əsas prioriteti əhali, sənaye və dövlət xidmətləri üçün etibarlı və əlçatan elektrik təminatıdır: “Eyni zamanda, Tacikistanın böyük hidroenerji potensialı mövcuddur. Su ehtiyatlarının yüksək olduğu dövrlərdə yaranan əlavə enerji istehsalı regional bazarlara təmiz enerji ixrac etmək üçün imkan yaradır”.

Tacikistan rəsmisi CASA-1000 layihəsinin regional əməkdaşlıq baxımından mühüm nümunə olduğunu vurğulayıb: “CASA-1000 regionun ən böyük enerji ötürmə layihələrindən biridir. Bu layihə Mərkəzi Asiya ilə Cənubi Asiyanı birləşdirir. Qırğızıstan və Tacikistanda istehsal olunan elektrik enerjisinin Əfqanıstan və Pakistan bazarlarına ötürülməsinə imkan yaradır”.

O, layihənin maliyyələşdirilməsində İslam İnkişaf Bankının rolunu da qeyd edib: “İslam İnkişaf Bankına bu layihənin əsas maliyyə tərəfdaşlarından biri kimi təşəkkür edirik”.

Məcidi bildirib ki, enerji bağlantıları yalnız elektrik ticarəti ilə məhdudlaşmır: “Bu, iki böyük region – Mərkəzi Asiya və Cənubi Asiya arasında digər əməkdaşlıq sahələrinin inkişafı üçün də platformadır. Elektrik əlaqələri rəqəmsallaşma və digər sahələrdə yeni imkanlar yarada bilər”.

Onun sözlərinə görə, müxtəlif enerji mənbələrinin inteqrasiyası regionun enerji balansını gücləndirir: “Tacikistanın hidroenerji imkanları bərpa olunan enerji mənbələri əsasında inkişaf edən regional sistemlər üçün balanslaşdırıcı güc yarada bilər”.

Oxşar xəbərlər

Ziqfrid Leffler: İnfrastruktur bağlantı yaradır, institutlar isə inteqrasiyanı təmin edir

Avropa İttifaqı ilə Azərbaycan arasında enerji sahəsində strateji tərəfdaşlıq mövcuddur

Pərviz Şahbazov: Enerji təhlükəsizliyi artıq milli təhlükəsizlik məsələsinə çevrilib

Tacikistan parlamentinin sədri: COP29 milli, regional və qlobal əməkdaşlıq mexanizminin formalaşmasına kömək edəcək

Tacikistan Prezidenti: “ECO ölkələri üçün enerji bazarı strategiyası hazırlanmalıdır”