Qarabağ və Şərqi Zəngəzurda aparılan bərpa və yenidənqurma işlərinin beynəlxalq mediada işıqlandırılması regiondakı humanitar çağırışlara qlobal diqqətin artmasına töhfə verib.

“APA-Economics” xəbər verir ki, bunu WUF13 çərçivəsində “Media as a Driver of Public Discourse on Housing and Urban Resilience” (“Medianın mənzil və şəhər dayanıqlılığı üzrə ictimai müzakirələrin formalaşmasında rolu”) mövzusunda keçirilən media brifinqində Milli Məclisin deputatı və Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü Rizvan Nəbiyev deyib.

O bildirib ki, işğal dövründə Azərbaycan jurnalistləri həmin ərazilərə gedə bilməsə də, beynəlxalq media Ağdam məscidinin dağıdılması və Ağdamın “Qafqazın Xirosiması” adlandırılması kimi faktları dünya ictimaiyyətinə çatdırıb.

Rizvan Nəbiyevin sözlərinə görə, media Qarabağ və Şərqi Zəngəzurda mina təmizlənməsi, ekoloji bərpa, mədəni irsin qorunması və keçmiş məcburi köçkünlərin reinteqrasiyası proseslərinin beynəlxalq səviyyədə tanıdılmasında mühüm rol oynayıb.

O qeyd edib ki, Azərbaycan ərazisinin təxminən 30%-i mina və partlamamış hərbi sursatlarla çirklənib, 1,5 milyondan çox mina və partlayıcı qurğu isə bölgədə əsas problemlərdən biri olaraq qalır.

Deputat əlavə edib ki, azad edilmiş ərazilərdə artıq minlərlə keçmiş məcburi köçkün doğma yurdlarına qayıdıb və növbəti on ildə 200-dən çox yaşayış məntəqəsinin bərpası planlaşdırılır.

Rizvan Nəbiyev vurğulayıb ki, dayanıqlı şəhərlərin gələcəyi yalnız fiziki infrastrukturdan deyil, həm də informasiya infrastrukturundan və ictimai dialoqun keyfiyyətindən asılıdır.

Oxşar xəbərlər

Qabil Abbasoğlu: Media dayanıqlı şəhər inkişafı və iqlim davamlılığı üzrə ictimai məsuliyyəti gücləndirir

Rizvan Nəbiyev: Türk Dövlətləri Təşkilatı beynəlxalq mövqelərini möhkəmləndirir

WUF13 çərçivəsində Qarabağ və Şərqi Zəngəzurda görülən işlərlə bağlı xüsusi təqdimatlar olacaq

“Açıq hökumətin təşviqində və korrupsiyaya qarşı mübarizədə medianın rolu” mövzusunda dəyirmi masa keçirilib - FOTO

III Şuşa Qlobal Media Forumu başa çatıb