Ukrayna Silahlı Qüvvələrinin bölmələri Moskva vilayətindəki Voronin Luxovitski adına aviasiya zavoduna zərbələr endirib.

“Report” Ukrayna KİV-ə istinadən xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Baş Qərargahın məlumatına görə, müəssisə “MiQ-29” və “MiQ-31” tipli qırıcılar istehsal edir.

“Bu müəssisə Rusiya ordusu üçün hissələrin mexaniki emalından tutmuş son yığılma, uçuş sınaqları və Rusiyanın “MiQ” döyüş təyyarələrinin təhvil verilməsinə qədər bütün iş kompleksini həyata keçirir. Zavodun ərazisində partlayışlar və yanğın qeydə alınıb”, - qurumdan bildirilib.

Həmçinin Ukrayna SQ-nin Xüsusi Əməliyyat Qüvvələri və Ukrayna Təhlükəsizlik Xidmətinin bölmələri Müdafiə Qüvvələrinin digər komponentləri ilə əməkdaşlıq şəklində akademik Şipunov adına Cihazqayırma Konstruktor Bürosuna zərbələr endiriblər.

Bundan əlavə, Ukrayna Müdafiə Nazirliyinin Baş Kəşfiyyat İdarəsindən bildirilib ki, iyulun 10-da Rusiyanın Tümen vilayətinin Xantı-Mansiysk Muxtar Dairəsində yerləşən Lanqepas şəhərində qaz kəməri partladılıb. Çelyabinsk, Orenburq və Sverdlovsk vilayətlərində Rusiyanın hərbi-sənaye kompleksi müəssisələrinə xidmət edən iri magistral qaz kəmərinin bir hissəsi məhv edilib.

Partladılmış qaz kəmərinin buraxıcılıq gücü ildə 2,6 milyard kubmetr qaz təşkil edir. “Qaz kompressor stansiyaları arasındakı məsafəni (təxminən 20 kilometr) nəzərə alsaq, partlayışlar nəticəsində zədələnmiş iki boruda təxminən 4 milyon 112 min m3 qaz olub”, - Ukrayna Baş Kəşfiyyat İdarəsindən vurğulanıb.

Oxşar xəbərlər

Baş Qərargahı: Ukrayna Müdafiə Qüvvələri Rusiya aerodromlarına zərbələr endirib

Rusiya Ukraynanın hərbi aerodromuna zərbə endirib

Ukrayna SQ: Rusiya gecə Ukrayna istiqamətdə 400-dən çox dron və 44 raket buraxıb

Rusiya PUA istehsal edən Ukrayna müəssisələrinə raket zərbəsi endirib

Ukrayna Təhlükəsizlik Xidməti Krımda Rusiyanın 3 helikopterinin məhv edildiyini bildirib