Qarşıdan gələn istilik mövsümündə Serbiyaya gündəlik sabit tariflə 100 min kubmetr və çevik tariflə 1 milyon kubmetrə qədər Azərbaycan qazının tədarükü planlaşdırılır.

Bunu “Sizinxeber.az”a müsahibəsində Serbiyanın mədən və energetika naziri Dubravka Cedoviç-Handanoviç bildirib.

“2025-2026-cı illərin qış mövsümündə tədarük həcmlərinin gündəlik 2 milyon kubmetrə qədər artırılması planlaşdırılır. Müvafiq müqavilələrin bağlanması prosesinin yaxın həftələrdə başa çatacağını gözləyirik”, - o bildirib.

Ötən istilik mövsümündə Azərbaycan Serbiyaya gündəlik 1-1,7 milyon kubmetr təbii qaz tədarük edib.

Xatırladaq ki, 2023-cü il noyabrın 15-də Azərbaycan Dövlət Neft Şirkəti (SOCAR) və Serbiyanın “Srbijagas” şirkəti arasında qaz satışına dair müqavilə imzalanıb. Müqavilədə 2024-2026-cı illərdə Azərbaycandan Serbiyaya ildə 400 milyon kubmetrə qədər qazın nəql olunması nəzərdə tutulub.

Bundan başqa, 2024-cü il sentyabrın 26-da SOCAR və “Srbijagas” arasında 1 noyabr 2024-cü il - 1 aprel 2025-ci il tarixləri arasında Serbiyaya əlavə gündəlik 1 milyon kubmetr Azərbaycan qazının təchizatını nəzərdə tutan müqavilə imzalanıb.

Həmçinin bildirilib ki, Azərbaycan Serbiyaya qaz tədarükünün həcmini mərhələli şəkildə ildə 1 milyard kubmetrə çatdırmağı planlaşdırır.

Müsahibənin tam versiyası ilə bu link vasitəsilə tanış ola bilərsiniz.

Oxşar xəbərlər

Cedoviç-Handanoviç: “Serbiya Azərbaycandan gündəlik 2 milyon kubmetrə qədər qaz tədarükü gözləyir"

Dubravka Cedoviç: "Azərbaycan qazının Serbiyaya əlavə tədarükü ilə bağlı Saziş imzalanacaq"

Dubravka Djedoviç: “Serbiya bu qış Azərbaycandan qaz nəqlinin artırılması ilə enerji təhlükəsizliyini gücləndirəcək”