Azərbaycan Latviya ilə iqtisadi və ticari əməkdaşlığın gücləndirilməsi istiqamətində bütün təşəbbüsləri dəstəkləyir.

“Sizinxeber.az” Kənd Təsərrüfatı Nazirliyinə istinadən xəbər verir ki, bunu Azərbaycanda səfərdə olan Latviyanın kənd təsərrüfatı naziri Armands Krauzenin rəhbərlik etdiyi nümayəndə heyəti ilə keçirilən görüşdə kənd təsərrüfatı nazirinin müavini Sarvan Cəfərov bildirib.

Nazir müavini Azərbaycanda aqrar inkişaf strategiyasının əsas istiqamətləri, aqrar sahəyə dövlət dəstəyi, həyata keçirilən innovativ layihələr barədə qonaqlara ətraflı məlumat verib.

Ölkəmizin etibarlı və əlverişli biznes mühitinin, eləcə də böyük tranzit potensialının olduğunu xatırladan S. Cəfərov qeyd edib ki, Latviyanın aqrar sahədə ixtisaslaşmış şirkətləri Azərbaycanda mövcud olan geniş investisiya imkanlarından yararlana bilər.

A.Krauze isə öz növbəsində Latviyanın Azərbaycanla bütün sahələr üzrə tərəfdaşlıq münasibətlərini inkişaf etdirməyə maraq göstərdiyini deyib. O kənd təsərrüfatı sahəsində qarşılıqlı əlaqələrin genişləndirilməsi üçün böyük potensialın olduğunu vurğulayıb.

Görüşdə aqrar sahədə əməkdaşlığın və hüquq-müqavilə bazasının gücləndirilməsi, kənd təsərrüfatı üzrə birgə İşçi Qrupun yaradılması, ixrac potensialı yüksək olan məhsullarla bağlı informasiya mübadiləsi, kənd təsərrüfatı və qida məhsullarının ticarət dövriyyəsinin artırılması, iş adamları arasında əlaqələrin genişləndirilməsi, Latviyalı sahibkarların Azərbaycan Beynəlxalq Kənd Təsərrüfatı Sərgisində iştirakı, müasir texnologiyaların transferi və aqrar sahədə elmi-tədqiqat və təhsil üzrə təcrübə proqramlarının həyata keçirilməsi məsələləri müzakirə olunub.

Tərəflər Azərbaycanla Latviya arasında kənd təsərrüfatı sahəsində gələcəkdə ikitərəfli əməkdaşlıq əlaqələrinin daha da inkişaf etdirilməsində, kənd təsərrüfatı və ərzaq məhsullarının ticarət dövriyyəsinin artırılmasında maraqlı olduqlarını ifadə ediblər.

Sonda qarşılıqlı maraq doğuran məsələlər barədə geniş fikir mübadiləsi aparılıb.

Oxşar xəbərlər

Danimarka fondu Azərbaycanla aqrar əməkdaşlığı genişləndirmək istəyir

Azərbaycan aqrar sığorta təcrübəsini Gürcüstanla bölüşəcək

Azərbaycanla Latviya arasında kənd təsərrüfatı üzrə İşçi Qrupu yaradılacaq

Bakı və Riqa hökumətlərarası komissiyanın iclasının tarixini razılaşdırıb

Kənd təsərrüfatı naziri: “Latviya Azərbaycandan aqrar məhsulların birbaşa tədarükündə maraqlıdır”