Tbilisi, Bakı və Ankara üçtərəfli əməkdaşlığın dərinləşdirilməsi üçün əhəmiyyətli potensiala malikdir.

"Sizinxeber.az" xəbər verir ki, bu barədə Gürcüstanın xarici işlər naziri Maka Boçorişvili İstanbulda keçirilmiş Türkiyə, Azərbaycan və Gürcüstan XİN başçılarının X Üçtərəfli Görüşünün yekunlarına dair mətbuat konfransında bildirib.

"Biz əminik ki, ölkələrimiz arasındakı qarşılıqlı fəaliyyət potensialını daha dolğun şəkildə reallaşdıra biləcəyik. Bu, əməkdaşlığın yeni istiqamətlərini açacaq, eyni zamanda, dövlətlərimizin imkanlarından daha səmərəli istifadə etməyə şərait yaradacaq və hər üç ölkənin rifahı naminə tərəfdaşlığın daha da möhkəmləndirilməsinə töhfə verəcək", - o qeyd edib.

XİN rəhbəri vurğulayıb ki, İstanbulda keçirilən görüş zamanı tərəflər iqtisadi məsələləri, eləcə də region ölkələrinin strateji coğrafi mövqeyini müzakirə ediblər:

"Nəqliyyat bağlantısına dair imkanlar bizim üçün mühüm perspektivlər açır. Avrasiya regionunda sülhün bərqərar olması ilə bu bağlantı daha da dayanıqlı olacaq, ticari-iqtisadi əlaqələr isə inkişaf üçün əlavə təkan əldə edəcək. Biz iki qitə arasında körpü rolunu oynamağa can atırıq. Bu gün münasibətlərimizə yeni təkan verə biləcək əlavə əməkdaşlıq istiqamətlərini də müzakirə etdik".

M.Boçorişvili Bakı-Tbilisi-Qars dəmir yolunun əhəmiyyətini ayrıca qeyd edərək onun potensialından maksimum səmərəli istifadənin vacibliyini vurğulayıb:

"Bu marşrut ticarətin genişlənməsinə, iqtisadi əlaqələrin möhkəmlənməsinə və regionun daha da inkişaf etməsinə töhfə verəcək".

Nazir, həmçinin Orta Dəhlizin inkişafı, onun ticarət və biznesin genişləndirilməsindəki rolu da daxil olmaqla müzakirə olunan layihələrin vacibliyini vurğulayıb.

M.Boçorişvilinin sözlərinə görə, region üçün strateji əhəmiyyət kəsb edən Qara dəniz sualtı elektrik kabeli layihəsinə xüsusi diqqət yetirilib.

"Biz həmçinin üçtərəfli münasibətləri, onların məzmun və miqyasının genişləndirilməsi imkanlarını müzakirə etdik. Əminik ki, tərəfdaşlığımızın potensialı xeyli genişdir, əməkdaşlığımız isə daha da dərinləşə bilər. Bugünkü görüş Türkiyə-Azərbaycan-Gürcüstan formatının əhəmiyyətini bir daha təsdiqlədi və onun böyük potensialını nümayiş etdirdi", - nazir əlavə edib.

Oxşar xəbərlər

İstanbulda Türkiyə-Azərbaycan-Gürcüstan XİN rəhbərlərinin görüşü keçiriləcək

Maka Boçorişvili: Cənubi Qafqaz strateji əhəmiyyətə malik bir regiondur

Boçorişvili və Fidan Orta Dəhlizin inkişafını müzakirə ediblər

Gürcüstan və ABŞ münasibətlərinin gələcəyi müzakirə edilib

Maka Boçorişvili: Azərbaycan Prezidenti ilə keçirilən görüş olduqca əhəmiyyətli idi