Suriyanın Əs-Suveyda əyalətinin druz icmasının rəhbərliyi ölkənin cənubunda baş verən qarşıdurmalardan sonra ərəb qəbilələri ilə əsir mübadiləsi əməliyyatına hazır olduğunu açıqlayıb.

“Report” xəbər verir ki, bu barədə Sham TV icmanın bəyanatına istinadən məlumat yayıb.

Əsir götürülən döyüşçülərin və girovların azad edilməsinə yerli vaxtla saat 18:00-da (Bakı vaxtı ilə 19:00) Umm Zeytun bölgəsində başlanılacağı bildirilir: “Biz hər kəsi əməkdaşlığa və bu prosesin uğurunu təmin etmək üçün maksimum məsuliyyət daşımağa çağırırıq. Qaçırılan insanların sağ-salamat qayıtmasına ümid edirik”.

Bəyanatda əyalətdə mobil rabitə və internetin dərhal bərpası tələbi də yer alıb.

Xatırladaq ki, Suriyanın cənubundakı Əs-Suveyda əyalətində keçid hökuməti qüvvələri ilə druz özünümüdafiə dəstələri arasında baş verən silahlı toqquşmalarda 940 nəfər həlak olub. Məlumata görə, iyulun 13-dən bəri davam edən toqquşmalarda druz bölmələri 326 döyüşçünü itirib, hökumət qüvvələrinin 312 hərbçisi həlak olub. İyulun 19-da Suriyanın keçid prezidenti Əhməd əş-Şaraa beynəlxalq vasitəçilərin iştirakı ilə hazırlanmış nizamlama planına uyğun olaraq Əs-Suveydada atəşkəs elan edib.

Oxşar xəbərlər

Suriya DİN İsrailin Əs-Suveydaya müdaxiləsini pisləyib

KİV: İsrail Suriyanın hərbi obyektlərinə hücumları dayandıracağına söz verib

KİV: İsrail Suriyanın cənubuna yenidən zərbələr endirir

Türkiyə XİN Suriyanın cənubunda baş verən zorakılıq hadisələrinə şərh verib

Suriyada yerli tayfalar arasında atışmalar nəticəsində 30-dan çox insan həlak olub