Vens Maskın siyasi partiya yaratmaq cəhdlərini “böyük səhv” adlandırıb

ABŞ-ın vitse-prezidenti Cey Di Vens amerikalı iş adamı İlon Maskın siyasi partiya yaratmaq cəhdlərini “böyük səhv” adlandırıb.

APA xəbər verir ki, bu fikri Vens "Fox News" telekanalına müsahibəsində səsləndirib.

Onun sözlərinə görə, Donald Trampın administrasiyasında işlədikdən sonra Mask artıq respublikaçılarla demokratlar arasında orta xətti tuta bilməz.

“Düşünürəm ki, İlon Mask üçün üçüncü partiya yaratmaq cəhdlərini davam etdirmək böyük səhv olar. Arqumentim bundan ibarətdir ki, istəsə də, istəməsə də, o, artıq radikal solçular tərəfindən sağçıların tərəfdarı kimi qəbul olunur. Onun həm demokratlar, həm də respublikaçılar tərəfindən seviləcəyi, hansısa orta siyasi xəttə yer ala biləcəyi fikri reallığa uyğun deyil”, – Vens bildirib.

Xatırladaq ki, iyulun 5-də İlon Mask ABŞ-da “Amerika” partiyasını yaratdığını açıqlamışdı.