2026-cı il dünya çempionatı futbol tarixinin ən fərqli və ən böyük turnirlərindən biri olacaq.

"Report"un araşdırmasına görə, ilk dəfə mundiala eyni anda üç ölkə – ABŞ, Kanada və Meksika ev sahibliyi edəcək.

Üstəlik, ilk dəfə yarışda 48 milli komanda mübarizə aparacaq. Bu isə həm oyun sayının, həm azarkeş marağının, həm də turnirin coğrafi miqyasının rekord həddə çatacağı anlamına gəlir.

FIFA-nın planına əsasən, mundialın matçları 16 şəhərdə keçiriləcək. Turnirin əsas yükünü ABŞ daşıyacaq. Belə ki, oyunlar adıçəkilən ölkənin 11 şəhərində baş tutacaq. Kanada və Meksika isə müvafiq olaraq hərəyə 2 və 3 şəhərlə mundial atmosferini yaşayacaq.

ABŞ-də oyunlara ev sahibliyi edəcək şəhərlər arasında Nyu-York/Nyu-Cersi, Los-Anceles, Mayami, Dallas, Atlanta, Sietl və San-Fransisko kimi nəhəng mərkəzlər yer alır. Xüsusilə Nyu-York/Nyu-Cersi bölgəsində yerləşən "Metlayf" stadionu turnirin final matçına ev sahibliyi edəcək. Təxminən 82 min tamaşaçı tutumuna malik arena mundialın ən möhtəşəm ünvanlarından biri hesab olunur.

Los-Ancelesdə yerləşən "Sou-Fay" (70 240 tamaşaçı), Dallasdakı "AT&T" (80 000 tamaşaçı) və Atlantadakı "Mercedes-Benz" stadionu (71 000 tamaşaçı) da yarışın əsas arenaları sırasında göstərilir. Müasir texnologiyalarla təchiz olunan bu stadionların hər biri dünya futbolunun ən böyük səhnəsinə çevriləcək.

Kanada tarixində ilk dəfə dünya çempionatının oyunlarını qəbul edəcək. Toronto şəhərində yerləşən "BMO Fild" (45 736 tamaşaçı) və Vankuver şəhərində yerləşən "Bi Si Pleys" (54 500 tamaşaçı) arenaları futbol bayramının bir hissəsi olacaq.

Meksika isə dünya futbol tarixində yeni rekord müəllifi olacaq. Belə ki, Mexiko şəhərində yerləşən məşhur "Asteka" stadionu (87 500 tamaşaçı) tarixdə üç dünya çempionatına ev sahibliyi edən ilk arena kimi adını futbol salnaməsinə yazdıracaq. Daha əvvəl burada 1970 və 1986-cı illərin mundial oyunları keçirilmişdi. Əfsanəvi Pele və Dieqo Maradonanı mundial zirvəsində görən stadion yenidən futbol dünyasının diqqət mərkəzinə çevriləcək.

Eyni zamanda, Meksikanın daha iki böyük şəhərində də mundialın görüşləri reallaşacaq. Qvadalaxarada yerləşən "Estadio Akron" (48 000 tamaşaçı) və Monterrey şəhərindəki "Estadio BBVA" (53 500 tamaşaçı) stadionları da turnirin əsas oyun məkanları sırasında yer alacaq.

2026-cı ilin mundialında ümumilikdə 104 oyun baş tutacaq. Açılış matçının Meksikada, finalın isə ABŞ-də keçirilməsi planlaşdırılır. Üçüncü yer uğrunda görüş isə Mayamidə yerləşən "Hard Rok" stadionunda (65 000 tamaşaçı) baş tutacaq. Turnirin geniş coğrafiyanı əhatə etməsi azarkeşlərə fərqli mədəniyyətləri, şəhərləri və futbol atmosferini eyni yarış daxilində yaşamaq imkanı yaradacaq.

Artıq indidən aydındır ki, DÇ-2026 təkcə futbol yarışı deyil, həm də Şimali Amerikanın ən böyük idman festivalına çevriləcək.

Oxşar xəbərlər

DÇ-2026: Bilet satışlarına sentyabrdan etibarən start veriləcək

FIFA DÇ-2030-da 64 komandanın iştirakını nəzərdən keçirir

ABŞ bu gündən Kanada və Meksika mallarına rüsumlar tətbiq edəcək

FIFA 2030 və 2034-cü illərdə dünya çempionatlarının keçiriləcəyi ölkələri rəsmən təsdiqləyib

ABŞ bu gün Kanada və Meksika mallarına rüsumların azaldılmasını elan edə bilər