"İğdır-Naxçıvan qaz kəmərinin istifadəyə verilməsi ilə bundan sonra da Naxçıvan Muxtar Respublikası beynəlxalq əhəmiyyətli logistik mərkəzə çevriləcək".

APA-nın Naxçıvan bürosu xəbər verir ki, bunu jurnalistlərə açıqlamasında iqtisadçı İbrahim Hənifəzadə deyib.

O bildirib ki, İğdır-Naxçıvan qaz kəmərinin istifadəyə verilməsi Naxçıvanın bir mənbədən olan enerji asılığını aradan qaldıracaq və eyni zamanda Naxçıvanın enerji təhlükəsizliyinin dayanıqlığını təmin edəcək: "Naxçıvan Muxtar Respublikası əlverişli coğrafi məkanda yerləşir. Hazırda ölkəmiz nəinki Cənubi Qafqazda, o cümlədən dünyada özünün hərtərəfli iqtisadi inkişaf parametrlərinə görə lider mövqedədir. Makroiqtisadi sabitliyin əsas göstəricisi olan ümumidaxili məhsulun hər il artan templə müşahidə olunması, ölkə iqtisadiyyatının sürətli iqtisadi inkişafının əsas göstəricilərindən biridir. Ölkəmiz dünyanın enerji təhlükəsizliyinin əsas təminatçısı ölkələrindən birinə çevrilib. Bakı-Tbilisi-Ceyhan neft, Bakı-Tbilisi-Ərzurum qaz, Bakı-Tbilisi-Qars dəmiryolu xəttinin bilavasitə hazırda fəaliyyət göstərməsi ölkəmizin beynəlxalq iqtisadi münasibətlər sistemində gücünü artırır və əlavə dividentlər gətirir".

Eyni zamanda, İ.Hənifəzadə qeyd edib ki, ötən əsrin 90-cı illərin əvvəllərində məlum hadisələr səbəbindən Naxçıvan Muxtar Respublikası blokada şəraitində yaşayıb. Hazırda muxtar respublikanın bilavasitə enerji təhlükəsizliyinin təminatı istiqamətində mühüm addımlar atılıb. Belə bir layihənin reallaşması bu gün nəinki Sədərək rayonu, eyni zamanda Naxçıvan Muxtar Respublikası üçün çox mühüm iqtisadi hadisələrdən biridir.

Oxşar xəbərlər

Türkiyənin baş konsulu: İğdır-Naxçıvan qaz kəmərinin önümüzdəki günlərdə tamamlanacağı gözlənilir

Sabah İğdır-Naxçıvan təbii qaz kəmərinin açılış mərasimi keçiriləcək

Naxçıvan Muxtar Respublikasının 2025-ci il büdcəsi təsdiq edilib

Azərbaycan və Türkiyə prezidentlərinin iştirakı ilə sabah İğdır-Naxçıvan qaz kəmərinin açılışı olacaq