Əsas prioritetimiz region üzrə müştərilərimizi dayanıqlı və etibarlı şəkildə enerji ilə təmin etmək, eyni zamanda regional enerji təhlükəsizliyinə töhfə verməkdir.

"Sizinxeber.az-Economics" xəbər verir ki, bu barədə 31-ci Bakı Enerji Forumunda çıxış edən SOCAR-ın prezidenti Rövşən Nəcəf bildirib.

"Ötən illə müqayisədə bu il qaz təchizatı coğrafiyasına artıq təkcə Avropa, Gürcüstan və Türkiyə deyil, həm də Suriya daxil edilib. Bu o deməkdir ki, Azərbaycan artıq Suriya bazarına da qaz tədarük edir", - Rövşən Nəcəf qeyd edib.

Onun sözlərinə görə, hazırkı vəziyyətdə tərəfdaşlar daha çox qaz almaqda maraqlıdırlar, lakin onlar bunun dayanıqlı şəkildə təmin olunmasını istəyirlər. Mövcud şəraitdə Azərbaycan qazı region üzrə ən etibarlı enerji mənbələrindən biri hesab olunur.

"Buna görə də tərəfdaşlarımızla birlikdə istehsal planlarının proqramımıza uyğun şəkildə irəliləməsini təmin etməliyik ki, regiondakı tərəfdaşlarımıza daha çox qaz tədarük edə bilək. Bu baxımdan müzakirə etdiyimiz əsas məsələlərdən biri Avropaya əlavə qaz ixracını mümkün etmək üçün Cənub Qaz Dəhlizinin genişləndirilməsidir. Lakin bu genişlənmənin həyata keçirilməsi ilə bağlı son beş ildə müzakirə etdiyimiz vəziyyət dəyişməz qalır.

Biz daha çox qaz tədarük etməyə və genişlənməyə hazırıq, lakin bunun üçün Avropadakı tərəfdaşlarımızın uzunmüddətli qaz alış müqavilələri bağlaması və genişlənmə layihəsinin maliyyələşdirilməsində iştirak etməsi zəruridir", - SOCAR prezidenti vurğulayıb.

Rövşən Nəcəfin sözlərinə görə, Azərbaycan qarşıdakı onilliklər ərzində qaz hasilatını artırmağa davam edəcək və tərəfdaş ölkələrin etibarlı təchizatçısı olaraq qalacaq. İstehlaka gəldikdə isə, indiyədək müşahidə etdiyimiz bütün proqnozlar və planlar göstərir ki, tələbat artmaqda davam edəcək və hətta daha da yüksələcək. Bunun iki əsas səbəbi var: birincisi, qlobal təchizat zəncirlərində baş verən pozuntular və daha etibarlı enerji mənbələrinin axtarışı; ikincisi isə, gözardı edilə bilməyən bazar və geosiyasi təzyiqlərdir.

Oxşar xəbərlər

Rövşən Nəcəf: "Azərbaycan qaz hasilatını artıraraq tərəfdaş ölkələrə tədarükü genişləndirəcək"

SOCAR və bp qlobal miqyasda yeni enerji işlənmələri imkanları üzrə əməkdaşlıq edəcək

bp-nin regional prezidenti: Azərbaycan qarşıdakı onilliklərdə dünya səviyyəli enerji qovşağına çevrilə bilər

Pərviz Şahbazov: Azərbaycan həm bu günün, həm də gələcəyin enerji təhlükəsizliyinə töhfə verir

SOCAR ilə Almaniya şirkəti arasında təbii qaz alışı üzrə müqavilə imzalanıb