"Azərbaycan-Gürcüstan-Türkiyə-Bolqarıstan" "yaşıl enerji dəhlizi"nin yaradılması regionun enerji təhlükəsizliyinin təmin edilməsində mühüm əhəmiyyət kəsb edir.

"Report" xəbər verir ki, bunu Türkiyənin xarici işlər naziri Hakan Fidan Sofiyada bolqarıstanlı həmkarı Velislava Petrova-Çamova ilə birgə mətbuat konfransında bildirib.

O, həmçinin energetikanın Türkiyə ilə Bolqarıstan arasında əməkdaşlığın əsas istiqamətlərindən biri olduğunu vurğulayıb: "Münasibətlərimiz hər il genişlənir, şaxələnir və dərinləşir".

"Ötən il Bakıda Azərbaycan və Gürcüstanın iştirakı ilə "yaşıl elektrik enerjisi"nin ötürülməsi və ticarəti sahəsində əməkdaşlıq haqqında imzalanmış memorandum enerji təhlükəsizliyi baxımından mühüm əhəmiyyət daşıyır. Eyni zamanda, həmin il imzalanmış elektrik enerjisi və enerji səmərəliliyi sahəsində əməkdaşlıq memorandumu sayəsində Bolqarıstanla enerji sahəsində əməkdaşlığımıza təkan veririk", - Fidan qeyd edib.

Xatırladaq ki, 2025-ci ilin aprelində Azərbaycan, Gürcüstan və Türkiyənin energetika nazirləri "yaşıl enerji" sahəsində əməkdaşlığa dair memorandum imzalayaraq Azərbaycan-Gürcüstan-Türkiyə-Bolqarıstan enerji dəhlizinin yaradılması layihəsinə start veriblər. Layihənin texniki-iqtisadi əsaslandırmasının hazırlanmasına 2026-cı ildə başlanılacaq.

Yeni dəhliz "yaşıl elektrik enerjisi"nin Xəzər regionundan Cənub-Şərqi Avropaya, xüsusilə Bolqarıstana, eləcə də Rumıniya və Macarıstana tədarükünü təmin edəcək.

Oxşar xəbərlər

Sofiyada Azərbaycan–Türkiyə–Gürcüstan–Bolqarıstan enerji dəhlizi üzrə texniki işlərə start verilir

Bolqarıstan Azərbaycan, Gürcüstan və Türkiyə ilə enerji memorandumunun imzalanmasına razılıq verib

Azərbaycan-Gürcüstan-Türkiyə-Bolqarıstan "yaşıl enerji dəhlizi" layihəsinə dair Memorandumun mətnini razılaşdırıblar

Azərbaycan-Gürcüstan-Türkiyə-Bolqarıstan Yaşıl Enerji Dəhlizi üzrə Anlaşma Memorandumu imzalanıb

Hüseyn Hüseynov: "Bakı və Sofiya arasında enerji əməkdaşlığı Aİ-nin təhlükəsizliyini gücləndirir"