Azərbaycanın dövlət xidmətləri modeli beynəlxalq səviyyədə yüksək qiymətləndirilir

"Report"un Gürcüstan bürosu xəbər verir ki, bunu Tbilisidə keçirilən BMT-nin Dövlət Xidməti Forumu çərçivəsində jurnalistlərə açıqlamasında Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev bildirib.

Onun sözlərinə görə, Azərbaycan 2015-ci ildən etibarən forumda "ASAN xidmət" modeli ilə təmsil olunur və ölkənin bu intellektual brendi beynəlxalq ictimaiyyətə təqdim edilir.

"Xatırlatmaq istərdim ki, məhz 2015-ci ildə BMT-nin Dövlət Xidməti Forumunda Azərbaycanın "ASAN xidmət" modeli dövlət xidmətləri sahəsində dünyanın ən yaxşı təcrübəsi kimi birinci yerə layiq görülmüşdü. Həmçinin forum Qafqaz regionunda ilk dəfə 2019-cu ildə Azərbaycanda keçirilib", - deyə Ü.Mehdiyev qeyd edib.

O vurğulayıb ki, Tbilisidə keçirilən builki forum Azərbaycan üçün daha bir əlamətdar hadisə ilə yadda qalıb. Belə ki, ölkənin daha bir dövlət qurumu beynəlxalq mükafata layiq görülüb:

"Bu, Əmək və Əhalinin Sosial Müdafiəsi Nazirliyinin Dövlət Sosial Müdafiə Fondunun fəaliyyəti ilə bağlı əldə etdiyi uğurlara verilən beynəlxalq və mötəbər qiymətdir. Forum çərçivəsində Azərbaycanın mükafat qazanması bizim üçün qürurverici hadisədir".

Agentlik sədri qeyd edib ki, BMT-nin Dövlət Xidməti Forumu dövlət xidmətləri sahəsində fəaliyyət göstərən ekspertləri, eləcə də müxtəlif ölkələrin müvafiq dövlət qurumlarını bir araya gətirən mühüm beynəlxalq platformadır.

Ü.Mehdiyevin sözlərinə görə, Azərbaycan modelinin bu platformada yüksək qiymətləndirilməsi ölkədə həyata keçirilən dövlət və sosial siyasətə, eləcə də bu sahədə aparılan islahatlara verilən beynəlxalq etimadın göstəricisidir.

Oxşar xəbərlər

BMT baş katibinin müavini "ASAN xidmət"də

"ASAN xidmət" modeli BMT konfransında beynəlxalq ictimaiyyətə təqdim olunub

BMT-nin Dövlət Xidməti Forumunda "ASAN xidmət" modelindən danışılıb

"ASAN Xidmət"in rəhbəri BMT-nin beynəlxalq forumunda iştirak edir

Ülvi Mehdiyev: "ASAN xidmət" modelini tətbiq edən ölkələr Azərbaycana və onun prezidentinə təşəkkür edir