BRICS-ə sədrlik edən Braziliya Nigeriyanın birliyə tərəfdaş ölkə kimi qoşulduğunu elan edib.

“Sizinxeber.az” xəbər verir ki, bu barədə Cənubi Amerika ölkəsinin Xarici İşlər Nazirliyi məlumat yayıb.

“BRICS-ə müvəqqəti sədrlik edən Braziliya hökuməti bu gün, 17 yanvar 2025-ci il tarixində Nigeriyanın birliyə tərəfdaş ölkə kimi rəsmən qoşulmasını elan edir”, – xarici siyasət idarəsinin mətbuat xidmətinin məlumatında deyilib.

XİN-ə görə, Abuca BRICS-in digər üzvləri ilə “ortaq maraqlara malikdir”: “O, Cənub – Cənub əməkdaşlığının gücləndirilməsində və qlobal idarəetmənin islahatında – Braziliyanın hazırkı sədrliyi dövründə əsas prioritetlər olan məsələlərdə fəal rol oynayır”.

Xatırladaq ki, Braziliya yanvarın 1-dən BRICS-ə sədrlik edir. 2024-cü ildə birliyə Rusiya sədrlik edirdi və onun sədrliyi dövründə əsas hadisə 22-24 oktyabrda Kazanda keçirilmiş sammit olub, burada tərəfdaş dövlətlər kateqoriyasının yaradılması barədə qərar qəbul edilib. İlk tərəfdaşlar Belarus, Boliviya, Qazaxıstan, Kuba, Malayziya, Tailand, Uqanda və Özbəkistan olub. İndoneziya da əvvəlcə BRICS-in tərəfdaşı kimi açıqlansa da, yanvarın 6-da Braziliya iqtidarı Cənub-Şərqi Asiya ölkəsinin birliyin tamhüquqlu üzvü olduğunu elan edib.

Ötən ilin avqustunda Azərbaycan BRICS-ə daxil olmaq üçün rəsmi müraciət etmişdi.

Qeyd edək ki, BRICS (BRİKS) 2006-cı ildə yaradılıb, Braziliya, Rusiya, Hindistan, Çin, Cənubi Afrika Respublikası, Misir, Efiopiya, İran, Birləşmiş Ərəb Əmirlikləri və İndoneziyanı özündə birləşdirən hökumətlərarası təşkilatdır. Əvvəlcə investisiya imkanlarını müəyyən edən qruplaşma hökumətləri 2009-cu ildən bəri hər il rəsmi sammitlərdə toplaşan və çoxtərəfli siyasətləri koordinasiya edən vahid geosiyasi bloka çevrilib.

Oxşar xəbərlər

13 ölkəyə BRICS-in tərəfdaşı statusu verilib

Qazaxıstan yanvarın 1-dən BRICS-in tərəfdaş ölkəsi olacaq

BRICS ölkələri tərəfdaş dövlətin meyarları barədə razılığa gəliblər, 13 dövlətin siyahısı razılaşdırılıb

Nigeriya BRİKS-in tərəfdaşı olub

Malayziya “BRICS” tərəfdaşı olmaq üçün dəvət alıb