Slovakiya kimi rəqiblə oyunda imkanlardan istifadə etməlisən.

Bunu “Report”a açıqlamasında AFFA Məşqçilər Komitəsinin üzvü Şakir Qəribov Azərbaycan yığmasının Millətlər Liqasında Slovakiya və Estoniyaya qarşı keçirdiyi matçlar barədə danışarkən deyib.

O, yığmadan gözləntilərin böyük olduğunu bildirib:

“Komandadan çox şey gözləyirdik. Əlbəttə, istəyərdik millimiz qələbə qazansın. Hansı ki, əvvəllər bunu edirdilər. Ardıcıl dörd turda uduzmuşuq. Komandanın qələbəsiz seriyası davam edir. Slovakiya qrupun lideridir. Avropa səviyyəli, hərtərəfli şəkildə güclü komandadır. Futbolçuları güclü klublarda çıxış edirlər. Estoniya yığmasına qarşı yaxşı oynadıq, qol vəziyyətləri yaratdıq, amma istifadə edə bilmədik. Futbolçularımız qol vurmaq istəyirlər, lakin ustalıq səviyyələri yetərli deyil. Birinci hissədə hesabda 2:0 və ya 3:0 irəlidə olmalı idik. Buna gücümüz çatırdı. Ancaq biz vura bilmədik, rəqib isə əlinə düşən imkanları qola çevirdi. Təcrübə də sözünü dedi. İkinci hissədə çətin oldu. Komanda oyunu bərabərləşdirməyə çalışırdı ki, üstünlük qazansın. Futbolun yazılmamış qanunlarından biri də odur ki, sən qol vurmasan, qapında top görəcəksən”.

Mütəxəssis Slovakiyaya məğlubiyyəti komandanın yorğunluğu ilə əlaqələndirib:

“Estoniyaya uduzmaq milliyə yaraşmadı. Təəssüf ki, belə oldu. Slovakiyanın isə güclü olduğunu, oyunun gərgin keçəcəyini bilirdik. Uşaqlar istəkli idi, qarşılaşma da nəticə əldə edə biləcəyimizi göstərirdi. Qol vəziyyətlərindən istifadə edə bilməyəndə bəzən futbolçular həvəsdən düşürlər. Belə rəqibə qarşı matçda imkanlardan istifadə etməlisən. Bundan başqa, ikinci hissədə yorğunluq hiss olundu. Uzun yol qət etmişdilər, yorğunluq yaranmışdı. Üstəgəl, oyun zamanı komandanın azlıqda qalması və müəyyən amillər təsir etdi”.

Qeyd edək ki, Fernandu Santuşun baş məşqçisi olduğu Azərbaycan millisi Millətlər Liqasında keçirdiyi son iki - Estoniya və Slovakiya ilə matçlarda 1:3 hesabı ilə məğlub olub.

Oxşar xəbərlər

Slovakiya yığmasının baş məşqçisi: "Azərbaycan komandası çox yaxşıdır"

Emin Mahmudov: Mən də penaltini qaçıra bilərdim

Slovakiya - Azərbaycan oyununun keçiriləcəyi stadion açıqlanıb

Slovakiya yığmasının dörd futbolçusu Azərbaycan millisi ilə matçda iştirak etməyəcək

Fernandu Santuş: "Sabahkı oyunda Bədavini kapitan kimi düşünürəm"