"Sabah"ın bu mövsüm Azərbaycan futbolunda "qızıl dubl" etməsi komanda üzvləri üçün süpriz olub.

Bunu "Report"a açıqlamasında Bakı kollektivinin futbolçusu Xəyal Əliyev deyib.

O, komandasının uğurlu çıxışından danışıb:

"İnanın, çox sevincliyik. Bir neçə gün əvvəl Azərbaycan Kubokunun finalında qələbə qazandıq və sevincimizi bölüşdük. Artıq Premyer Liqada çempionluğu da rahat qeyd edə bilərik. İki kuboka sahib çıxmaq bizim üçün də sürpriz nəticə idi. İnşallah, uğurlarımızın davamı gələr. Özümüzə inam var. Çempionlar Liqasının əsas mərhələsinə düşmək istəyirik və buna inanırıq".

Azərbaycan millisinin də şərəfini qoruyan yarımmüdafiəçi yığmanın mayın 28-dən 30-dək Bakıda, iyunun 1-dən 10-dək isə Avstriyanın Bad-Valtersdorf şəhərində keçiriləcək təlim-məşq toplanışına toxunub:

"Komanda ayın sonunda bir araya gələcək. Millinin son oyunlarına çağırılan futbolçu kimi təəssüratlarım yüksəkdir. Son olaraq Azərbaycanda təşkil olunan "FIFA Series-2026" turnirində qalib gəldik. Bəzilərinə asan görünə bilər, amma o da çətin turnir idi. Orada əldə etdiyimiz uğur bizə əlavə motivasiya verir. Qarşıda bizi San Marino və Malta millilərinə qarşı görüşlər gözləyir. İnanırıq ki, qələbə bizim olacaq".

Oxşar xəbərlər

"Sabah"ın qapıçısı Stas Pokatilov: "Qarşıda bizi Çempionlar Liqası hekayəsi gözləyir"

SOCAR komandasının baş məşqçisi: "Böyükhesablı qələbə bizim üçün də sürpriz oldu"

Arif Əsədov: "Avrokuboklara son iki vəsiqənin sahibi “Araz-Naxçıvan” və “Turan Tovuz” olacaq"

Valdas Dambrauskas Azərbaycanda "qızıl dubl" edən ilk əcnəbi baş məşqçi olub

Millinin baş məşqçisi: "Azərbaycan Basketbol Liqasında "Sabah" - "Neftçi" finalı görə bilərik"