Bakı Hərbi Məhkəməsində davam etdirilən məhkəmə prosesində ifadə verən zərərçəkmiş şəxs Zahid Həsənov əsir düşməsi, əsirlik zamanı gördüyü işgəncələrdən danışıb.

Sizinxeber.az xəbər verir ki, o, 1994-cü il martın 7-də Füzuli rayonunun Aşağı Seyidəhmədli kəndində yaralandığını, martın 8-dək orada qaldığını bildirib və əlavə edib: “Mart ayının 8-də həmin kəndə ermənilər daxil oldu. Biz 4 nəfər yaralını əsir götürdülər. Yaralı vəziyyətdə bizi “KamAZ”la aparanda, sonra xəstəxanada da işgəncə verdilər.

Bizi Xankəndidəki 3 saylı uşaq xəstəxanasında saxladılar. Bizim əsir və girovlar, o cümlədən qadınlar və uşaqlar oradaydı. Beynəlxalq Qızıl Xaç Komitəsi də bizə baxmırdı. Komitənin Mark adlı nümayəndəsi var idi, tibbi bacısı isə Veronika idi. Mən təxminən bir ay yarım orada qalmışam. Həmin müddətdə Mark ora iki dəfə gəldi. Nə yaramıza baxdı, nə də bir şey elədi. Gələndə də Mark içkili olurdu, yanındakı tərcüməçilər də erməni qızları idi. Sonra bizi Şuşa həbsxanasına apardılar, Mark ora ümumiyyətlə gəlmədi”.

O, Xankəndidə xəstəxanada saxlanılan zaman orta məktəb şagirdlərinin müəllimləri ilə birlikdə onlara baxmağa gəldiyini bildirib: “Bizi uşaqlara göstərib deyirdilər ki, baxın, bunlar türkdür, sizin düşmənlərinizdir. Uşaqlar da bizə tüpürürdü, daş atırdı”.

Zərərçəkmiş şəxs qeyd edib ki, bəzi əsirlər döyülərək öldürülüb. Ermənilər onlara məhz azərbaycanlı olduqları üçün işgəncələr verib.

Qeyd edək ki, Ermənistanın hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq, terrorçuluğu maliyyələşdirmə, hakimiyyəti zorla ələ keçirmə, onu zorla saxlama və digər çoxsaylı cinayətlər törətməkdə təqsirləndirilən Ermənistan Respublikasının vətəndaşlarının məhkəməsi mayın 29-da davam etdiriləcək.

Oxşar xəbərlər

Məhkəmədə zərərçəkmiş şəxs Madat Babayanı tanıyıb: O, “sən türksən” deyib məni təpiklədi

ABŞ Dövlət Departamenti Ukraynada əsir düşən Çin əsgərləri ilə bağlı məlumatı şərh edib

Ermənistanın əsir götürdüyü şəxslər gördükləri işgəncələrlə bağlı məhkəmədə ifadə veriblər

Qaradağlı sakini: Atam girovluqda Ermənistan hərbçilərinin işgəncələri nəticəsində öldü

Bağanıs Ayrım kəndindən olan zərərçəkmiş: Ermənilər 39 günlük körpəmi qətlə yetirdilər