Maliyyə cinayətləri, xüsusilə cinayət yolu ilə əldə edilmiş əmlakın leqallaşdırılması və terrorçuluğun maliyyələşdirilməsi təkcə iqtisadi sabitliyə deyil, həm də ictimai və milli təhlükəsizliyə ciddi təhdidlər yaradır.

“Sizinxeber.az” xəbər verir ki, bunu Azərbaycanın iqtisadiyyat nazirinin müavini Anar Axundov “Cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizədə nəzarət orqanlarının rolu, vəzifələri və məsuliyyəti” mövzusunda keçirilən beynəlxalq elmi-praktik konfransda bildirib.

Nazir müavini qeyd edib ki, bu təhdidlərin qarşısının alınması yalnız effektiv milli nəzarət mexanizmləri ilə deyil, həm də beynəlxalq əməkdaşlığın gücləndirilməsi ilə mümkündür:

“Azərbaycan hökuməti bu istiqamətdə mütərəqqi islahatlar həyata keçirməklə yanaşı, FATF və MONEYVAL kimi nüfuzlu beynəlxalq qurumlarla sıx əməkdaşlıq edir. Eyni zamanda, milli qanunvericiliyin beynəlxalq standartlara uyğunlaşdırılması istiqamətində ardıcıl addımlar atılır”.

A. Axundov bildirib ki, rəqəmsal texnologiyaların və süni intellektin imkanlarından istifadə etməklə risk əsaslı nəzarət sistemlərinin təkmilləşdirilməsinə xüsusi diqqət yetirilir:

“İqtisadiyyat Nazirliyi olaraq kölgə iqtisadiyyatının miqyasının azaldılması, qeyri-rəsmi dövriyyələrin şəffaf iqtisadi mühitə inteqrasiyası istiqamətində davamlı tədbirlər həyata keçiririk”.

O vurğulayıb ki, şəffaflığın artırılması, korrupsiyaya qarşı mübarizə və cinayət yolu ilə əldə edilmiş əmlakın leqallaşdırılmasının qarşısının alınması hökumətin prioritet istiqamətlərindəndir: “Bu tədbir məhz bu istiqamətdə səyləri birləşdirmək, beynəlxalq təcrübəni bölüşmək və qarşılıqlı etimadı möhkəmləndirmək baxımından xüsusi əhəmiyyət daşıyır”.

Oxşar xəbərlər

Zaur Fətizadə: "Auditor hesabatlarında ƏL/TM riski ilə bağlı qeyd və tövsiyələr standartlaşdırılmalıdır"

Vahid Novruzov: "Azərbaycanda şübhəli maliyyə əməliyyatlarına qarşı məsuliyyət artırılmalıdır"

AMB institusional risk qiymətləndirilməsinə dair Metodoloji Rəhbərliyi təsdiq edib

Bakı beynəlxalq maliyyə təhlükəsizliyi konfransına ev sahibliyi edəcək

Maliyyə Nazirliyinin bəzi vəzifələri ləğv edildi