İsveçrədə əhalinin sayını 10 milyonla məhdudlaşdırmaq təklifi referendumla rədd edilib.

"Report"un "Reuters"ə istinadən məlumatına görə, seçicilər iqtisadi sabitliyi və Avropa İttifaqı ilə əlaqələri dəstəkləyirlər.

Referendumun nəticələrini ənənəvi olaraq ümumiləşdirən SRF-in məlumatına görə, seçicilərin təxminən 45 %-i təklifin lehinə, 55 %-i isə əleyhinə səs verib.

Qurum qeyd edir ki, səsvermə sahibkarlar arasında narahatlıq doğurub və onlar bunun ölkənin əsas ticarət tərəfdaşı olan Aİ ölkələri ilə işçilərin sərbəst hərəkətinə son qoyacağından ehtiyatlanıblar.

Sağçı İsveçrə Xalq Partiyası tərəfindən irəli sürülən təklifdə əhalinin 2050-ci ilə qədər 10 milyonla məhdudlaşdırılması tələb olunurdu, əgər bu, iki il ərzində baş verərsə, İsveçrə Aİ daxilində sərbəst hərəkətə son qoymalı olacaqdı.

"GFS Bern" sosioloji şirkətinin əməkdaşı Urs Bierinin sözlərinə görə, təşəbbüs uğursuz olub, çünki əhali artımı ilə bağlı geniş yayılmış narahatlığa baxmayaraq, insanlar plana inanmayıblar və mümkün "əlavə təsirlərdən" qorxublar.

14:32

Bu gün İsveçrədə immiqrasiya və mənzil böhranı təhlükəsi, eləcə də dövlət xidmətlərində yükün artması səbəbindən ölkə əhalisinin sayının məhdudlaşdırılması məsələsi üzrə referendum keçirilib.

"Report" "Reuters"ə istinadən xəbər verir ki, mərkəz-sağçı İsveçrə Xalq Partiyası Konstitusiyaya 2050-ci ilə qədər əhalinin sayının 10 milyon nəfəri keçməməsini nəzərdə tutan düzəliş etməyi təklif edib.

Rəsmi proqnozlara görə, bu, 2040-cı illərin əvvəllərində baş verəcək. Son illər güclü əmək bazarı sayəsində İsveçrə əhalisinin sayı nəzərəçarpacaq dərəcədə artıb. 2025-ci ilin sonunda ölkədə təxminən 9,1 milyon nəfər yaşayırdı ki, onların da təqribən 27 %-nin İsveçrə vətəndaşlığı yoxdur.

Əhalinin sayı 9,5 milyon nəfəri keçərsə, bu təşəbbüs parlamenti sığınacaq verilməsini və ailələrin birləşməsini məhdudlaşdırmağa məcbur edəcək, 10 milyon həddinə çatdıqda isə Avropa İttifaqı ilə hərəkət azadlığı haqqında sazişlərin ləğv edilməsi tələb olunacaq.

Sorğular göstərir ki, təklif az səs fərqi ilə rədd ediləcək; hökumət və iri işgüzar dairələr bunun iqtisadiyyata zərər verəcəyini, milli rifahı sarsıdacağını və təhlükəsizlik sahəsindəki həyati əhəmiyyətli Avropa paktlarını təhlükə altına atacağını xəbərdar edərək ona qəti şəkildə qarşı çıxır.

Onların sözlərinə görə, təşəbbüs iqtisadiyyatının əhəmiyyətli bir hissəsi - tibbi tədqiqatlar və tikintidən tutmuş səhiyyəyə qədər böyük dərəcədə əcnəbilərin, ilk növbədə qonşu Aİ ölkələrindən gələnlərin əməyindən asılı olan İsveçrənin rifahına zərbə vura bilər.

Agentlik qeyd edir ki, ötən il ABŞ Prezidenti Donald Tramp İsveçrə mallarına Avropada ən yüksək rüsumlar tətbiq edib və əhalinin sayının azalması perspektivi korporativ planlaşdırmanı çətinləşdirə bilər. Lakin İsveçrə Xalq Partiyasının deputatı Tomas Matter bildirib ki, İsveçrədə rifahın artması ümumi immiqrasiya ilə ayaqlaşa bilmir və ölkə tempi aşağı salmalıdır.

Oxşar xəbərlər

İsveçrədə əhali sayının məhdudlaşdırılması ilə bağlı referendum keçirilib

İsveçrədə referendum: Əhali sayı azaldılır, ölkə Şengendən çıxır

İsveçrəlilər əhalinin 10 milyon nəfərlə məhdudlaşdırılması təşəbbüsünü rədd ediblər - YENİLƏNİB

İsveçrədə əhali sayının azaldılması ilə bağlı referendum keçirilir

Cenevrə parlamenti ermənipərəst deputatların Azərbaycan əleyhinə qətnamə layihəsini rədd edib