2024-2025-ci tədris ilindən başlayaraq Füzuli şəhərindəki Kurmanqazı adına Uşaq Yaradıcılıq Mərkəzində rayonun gənc sakinləri üçün ilk dəfə davamlı incəsənət təhsilinin tədrisi təşkil olunacaq.

Bu barədə APA-ya Mədəniyyət Nazirliyindən məlumat verilib.

Bildirilib ki, Böyük Qayıdış proqramı çərçivəsində Bakı və digər rayonlardan Füzuli şəhərinə köç edən sakinlərin övladları üçün yeni tədris ilində fortepiano, qanun, qarmon, tar, violin və rəqs ixtisasları üzrə tədris həyata keçiriləcək. Proqram çərçivəsində 24 şagird, 5 təcrübəli müəllimdən təhsil alacaq. Növbəti müddətdə şagirdlərin sayı daha da artacaq.

Qeyd edək ki, cari ilin mart ayında istifadəyə verilən Kurmanqazı adına Uşaq Yaradıcılıq Mərkəzi, Füzuli şəhərinin gənclərinə yaradıcı imkanlar və incəsənət sahəsində təhsil almaq imkanı təmin etmək məqsədi ilə inşa edilib. Ötən müddət ərzində Mədəniyyət nazirliyinin bilavasitə təşkilatçılığı ilə bu yaradıcılıq mərkəzində füzulili şagirdlər üçün müxtəlif sənət növləri üzrə təlimlər keçirilmiş, eyni zamanda Füzulidə yaşayan məktəblilər üçün yay məktəbi təşkil edilmişdir.

Oxşar xəbərlər

Kurmanqazı adına Uşaq yaradıcılıq mərkəzində “Füzulidə yay məktəbi”nin açılışı olub

Füzulidə məktəblilərin yay düşərgəsi təşkil olunacaq

MÜTDA: 71 minə yaxın uşaq məktəbəhazırlıq qrupuna qəbul edilib