Maliyyə Nazirliyinin nümayəndə heyəti Cənubi Koreyanın paytaxtı Seula işgüzar səfər çərçivəsində dövlət maliyyəsinin rəqəmsal idarə olunması sahəsində beynəlxalq təcrübənin öyrənilməsi və qabaqcıl texnoloji həllərin tətbiqi məqsədilə seminar və təlimlərə qatılıb.

"Sizinxeber.az" bu barədə nazirliyə istinadən xəbər verir.

Məlumata görə, tədbir çərçivəsində İnteqrasiya olunmuş Maliyyə İdarəetmə Sistemləri (IFMIS) üzrə texniki potensialın artırılması, müasir rəqəmsal xəzinədarlıq həllərinin öyrənilməsi, qabaqcıl "dBrain+" platformasının funksional imkanları və texniki məsləhət layihələrinin hazırlanması məsələləri müzakirə edilib. Eyni zamanda, dövlət maliyyə nəzarəti və xəzinədarlıq proseslərinin rəqəmsallaşdırılması üzrə beynəlxalq təcrübə və innovativ texnoloji yanaşmaların tətbiqi istiqamətində fikir mübadiləsi aparılıb.

Qeyd olunub ki, iki ölkə arasında dövlət maliyyəsinin rəqəmsal idarə olunması üzrə əməkdaşlıq çərçivəsində Cənubi Koreyanın dəstəyi ilə bu il Azərbaycanda yeni nəsil xəzinədarlıq informasiya sisteminin yaradılması, eləcə də maliyyə nəzarəti xidmətinin rəqəmsallaşdırılması məqsədilə "e-Nəzarət" informasiya sisteminin tətbiqi istiqamətində məsləhətçi dəstəyinin göstərilməsi nəzərdə tutulur. Sözügedən təşəbbüslər dövlət maliyyəsinin idarə olunmasında şəffaflığın artırılması, nəzarət mexanizmlərinin gücləndirilməsi və operativ qərar qəbuletmə imkanlarının genişləndirilməsinə xidmət edir.

Maliyyə Nazirliyinin bu təşəbbüsü dövlət maliyyəsinin idarə olunması sisteminin müasirləşdirilməsi, rəqəmsal transformasiyanın sürətləndirilməsi və institusional potensialın gücləndirilməsi istiqamətində mühüm addım kimi qiymətləndirilir.

Oxşar xəbərlər

Azərbaycan dövlət maliyyəsinin idarəedilməsi sahəsində aparılan islahatlara “Oliver Wyman”ı cəlb etmək istəyir

Azərbaycanda dövlət maliyyəsinin idarə olunması vahid platformada birləşdirilir

Azərbaycan rəqəmsal vergi texnologiyaları üzrə Cənubi Koreya təcrübəsini öyrənəcək

Azərbaycan İsraillə birgə Kibertəhlükəsizlik Əməliyyat Mərkəzi yarada bilər