İrlandiya hakimiyyəti Avropa İttifaqının (Aİ) Moskva əleyhinə sanksiyalarına baxmayaraq, ölkə tərəfindən idxal edilən əhəmiyyətli miqdarda alüminium oksidinin Rusiyanın müdafiə təchizat zəncirlərinə daxil ola biləcəyi ilə bağlı məlumatlarla bağlı araşdırmalarını davam etdirir.

"Sizinxeber.az"un Avropa bürosunun məlumatına görə, Aİ diplomatiyasının rəhbəri Kaya Kallas bu açıqlamanı Dublində İrlandiyanın xarici işlər naziri Helen Makenti ilə görüşdən sonra verib.

Məsələ, bu daşınmaların əslində Rusiyanın hərbi sənaye kompleksini silah istehsalında istifadə olunan materiallarla təminatına kömək etdiyini iddia edən jurnalist araşdırmasının dərcindən sonra diqqət çəkib. "Bütün faktları müəyyən etmək bizim üçün vacibdir. Araşdırmalar davam edir və biz İrlandiya hökumətinin bu araşdırmaları aparacağına inanırıq", - Kallas deyib.

Avropa diplomatiyasının rəhbəri qeyd edib ki, Brüssel sanksiyalar rejiminə nəzarəti gücləndirməli və mövcud boşluqları bağlamalıdır.

"Avropa bütün boşluqları bağlamalı, sanksiyaların tətbiqini sərtləşdirməli və öhdəliklərimizin konkret hərəkətlərlə dəstəkləndiyini təmin etməlidir. Heç bir Avropa məhsulu Ukrayna mülki vətəndaşlarını öldürən dron və raketlərdə olmamalıdır", - o bildirib.

İyunun 9-da təqdim edilən Aİ-nin Rusiyaya qarşı 21-ci sanksiya paketinə alüminium oksidinin niyə daxil edilməməsi ilə bağlı suala cavab olaraq Kallas etiraf edib ki, məsələ birlik daxilində müzakirə mövzusu olaraq qalır.

"Bu hal göstərir ki, biz də diqqət yetirməliyik. Rusiyanın müharibəni davam etdirməsi üçün lazım olan materiallara, istər müxtəlif metallara, istərsə də neft məhsullarına baxmalıyıq. Gələcək sanksiyaları hazırlayarkən yeni həllər tapmalı və yaradıcı olmalıyıq", - o deyib.

K.Kallasın sözlərinə görə, sanksiya siyasətinin əsas məqsədi dəyişməz olaraq qalır: Rusiyanı hərbi əməliyyatları davam etdirmək üçün resurslardan məhrum etmək.

O, qarşıdan gələn 22-ci sanksiya paketinə alüminium oksidinin daxil edilib-edilməməsi barədə suala Estoniya da daxil olmaqla bir neçə üzv dövlətin artıq belə bir addımı dəstəklədiyini, lakin onun qəbulu üçün bütün Aİ ölkələrinin razılığının tələb olunacağını bildirib.

"Bu ideyanı irəli sürən üzv dövlətlər var, lakin nəticədə bütün ölkələrin razılığı vacibdir. Hazırda bu material sanksiya paketlərinə daxil deyil", - o deyib.

Oxşar xəbərlər

Kaya Kallas: Aİ Rusiyaya qarşı yeni sanksiya paketinin qəbul edilməsinin son mərhələsindədir

Kaya Kallas: Aİ Rusiyaya qarşı növbəti sanksiyalar üzərində işləyir

Kallas: Rusiya ilə Ukrayna arasında müharibəni bitirmək üçün Transatlantik birliyə ehtiyac var

Kallas: Aİ 18-ci anti-Rusiya sanksiyalar paketi ilə bağlı razılığa gələ bilməyib

Kallas Azərbaycan və Ermənistan XİN rəhbərləri ilə telefonla danışıb