"Kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı"nın icrası məqsədi ilə rayonlar üçün "mini inkişaf planları" hazırlanacaq.

"Sizinxeber.az"un Biləsuvara ezam olunmuş müxbiri xəbər verir ki, bunu Azərbaycan Prezidentinin sosial iqtisadi məsələlər üzrə köməkçisi Xalid Əhədov Dövlət Proqramı çərçivəsində keçirilən Şirvan-Salyan iqtisadi rayonu üzrə regional müşavirədə bildirib.

Onun sözlərinə görə, bu hədəflərə nail olmaq üçün genişmiqyaslı işlərin həyata keçirilməsi zəruridir: "Bu prosesdə aidiyyəti dövlət qurumlarının nümayəndələri, yerli icra hakimiyyətləri, fermerlər və təsərrüfat subyektləri yaxından iştirak etməlidirlər. Əks halda, qarşıya qoyulan yüksək nəticələrin əldə olunması çətinləşə bilər. Buna görə də sıx koordinasiya, effektiv fəaliyyət vacibdir. Bugünkü müşavirədə iştirak edən icra hakimiyyəti başçıları, sahibkarlar və iri fermer təsərrüfatlarının nümayəndələri dövlət proqramından irəli gələn vəzifələrin icrasına xüsusi diqqət yetirməlidirlər".

"Bu vəzifələr istiqamətlər üzrə qruplaşdırılaraq müəyyənləşdirilə bilər. Birinci istiqamət ondan ibarətdir ki, yerli icra hakimiyyəti başçıları və onların aparatları dövlət proqramı çərçivəsində aidiyyəti qurumlarla birlikdə aqrar sahə üzrə əsas hədəf göstəricilərini və nəticə indikatorlarını müəyyən etməli, hər bir rayon üzrə 2026–2030-cu illəri əhatə edən sosial-iqtisadi inkişaf proqramları hazırlamalıdırlar. Yəni ümumi dövlət proqramına uyğun olaraq hər bir rayon öz səviyyəsində "mini proqramlar" formalaşdırmalı və bu sənədlər əsas strategiya ilə uzlaşdırılmalıdır. Eyni zamanda, icra hakimiyyətləri dövlət proqramında nəzərdə tutulan tədbirlərin həyata keçirilməsi üçün bütün zəruri dəstəkləyici addımları atmalıdırlar. Emal müəssisələrinin yaradılması, məhsuldarlığın artırılması və digər istiqamətlər üzrə onlara aid olan vəzifələr vaxtında və effektiv şəkildə icra olunmalıdır", - deyə X.Əhədov qeyd edib.

Onun sözlərinə görə, yerli imkanlardan istifadə etməklə dövlət proqramının fermerlər və sahibkarlar arasında geniş təbliği də gündəlik fəaliyyətin tərkib hissəsinə çevrilməlidir: "Təbliğat işlərində ölkə Prezidentinin çıxışlarında əksini tapan əsas müddəalar rəhbər tutulmalı, sahibkarlar və fermerlər proqramın mahiyyəti barədə dolğun məlumatlandırılmalıdır. Bütün imkanlar səfərbər edilməklə sahibkar və fermerlərin dövlət başçısının çağırışlarına qoşulması üçün zəruri tədbirlər həyata keçirilməlidir. Məlum olduğu kimi, dövlət proqramı ciddi maliyyə tutumuna malikdir. Belə ki, ümumi maliyyələşmənin 2,2 milyard manatını dövlət, 3,7 milyard manatını isə özəl sektor və fərdi təsərrüfat subyektləri təmin etməlidir. Buna görə də təşviqedici və maarifləndirici tədbirlər gücləndirilməli, sahibkarların bu prosesə fəal qoşulması və investisiya yatırmaları stimullaşdırılmalıdır".

Oxşar xəbərlər

Zəngilanda aqrar sektorun inkişafı müzakirə olunur

Xalid Əhədov: "Dövlət Proqramı yüksək əlavə dəyər əsaslı kənd təsərrüfatı hədəfləyir"

Prezidentin köməkçisi: "52 aqropark kənd təsərrüfatının inkişafını sürətləndirib"

Xalid Əhədov: "Azərbaycanda aqrar sahədə inqilabi islahatlar həyata keçirilib"

Zeynal Nağdəliyev Dövlət Proqramının icrası üçün qurumlararası koordinasiyanı gücləndirməyə çağırıb