BƏƏ və Səudiyyə Ərəbistanı dronların alınmasından istehsalına keçir

Səudiyyə Ərəbistanı və Birləşmiş Ərəb Əmirlikləri (BƏƏ) pilotsuz aviasiya proqramlarını fəal şəkildə genişləndirərək artıq yalnız hazır sistemlərin idxalına deyil, həm də texnologiya transferinə və yerli istehsala üstünlük verir.

Sizinxeber.az xəbər verir ki, bu barədə Forbes yazır.

Mənbələrin məlumatına görə, BƏƏ-nin müdafiə holdinqi EDGE Group İsrailin Elbit Systems şirkəti ilə Hermes 900 kəşfiyyat dronlarının tədarükü barədə danışıqlar aparır. Havadakı qalma müddəti 30 saatdan çox olan və 9 km hündürlüyə qalxa bilən bu aparatların yalnız alınması deyil, həm də lisenziya əsasında birbaşa Əmirliklərdə yığılması planlaşdırılır. Texnologiyanın mərhələli şəkildə ötürülməsi nəzərdə tutulur ki, bu da ölkəyə belə sistemlərin təkcə istehlakçısı deyil, həm də istehsalçısı olmaq imkanı verəcək.