İsrail Ordusu Qəzzada “təhlükəsiz marşrutlar” təşkil edir - YENİLƏNİB

İsrail Müdafiə Qüvvələri (İDF) bazar günü elan edib ki, Qəzza zolağının sıx məskunlaşmış bölgələrində hər gün “yerli taktiki hərbi fasilələr” həyata keçiriləcək.

APA xəbər verir ki, ordunun açıqlamasına görə, bu fasilələr İDF-nin hazırda quru qoşunları ilə əməliyyat aparmadığı ərazilərdə – o cümlədən əl-Mavasi, Deyr əl-Bəlah və Qəzza şəhərində –hər gün saat 10:00-dan 20:00-dək qüvvədə olacaq və bu tədbirlər “əlavə xəbər verilənə qədər” davam edəcək.

Bu açıqlama bəzi ərəb ölkələrinin İsrailin icazəsi ilə Qəzzaya humanitar yardım göndərməyə yenidən başlaması fonunda verilib. Bu addım bölgədə genişlənən aclıq təhlükəsinə dair narahatlıqların artdığı bir dövrdə atılıb.

Ordu bildirib ki, bu qərarın məqsədi Qəzza zolağına daxil olan humanitar yardımın miqyasını artırmaqdır. Həmçinin qeyd olunub ki, bu qərar Birləşmiş Millətlər Təşkilatı (BMT) və digər beynəlxalq təşkilatlarla razılaşdırılıb.

Bundan əlavə, İDF qeyd edib ki, saat 06:00-dan 23:00-dək BMT və humanitar yardım təşkilatlarının ərzaq və dərman çatdırmaq və paylamaq üçün təhlükəsiz şəkildə hərəkət etməsinə imkan verəcək “təhlükəsiz marşrutlar” ayrılacaq.

***

09:12

İsrail Müdafiə Qüvvələri Qəzza zolağında sıx məskunlaşmış ərazilərdə hərbi fəaliyyətin “yerli taktiki fasiləsi”ni həyata keçirəcəyini elan edib.

APA xəbər verir ki, bu barədə İsrail Ordusunun mətbuat xidməti məlumat yayıb.

Bu fasilə hər gün saat 10:00-dan 20:00-a qədər davam edəcək.

Ordu bildirib ki, bu “fasilə” İsrail Müdafiə Qüvvələrinin hazırda quru qoşunları ilə fəaliyyət göstərmədiyi bölgələrdə, o cümlədən əl-Mavasi, Deyr əl-Bəla və Qəzza şəhərində həyata keçiriləcək və “ikinci xəbərdarlığa qədər hər gün” davam edəcək.

Bundan əlavə, ordu saat 06:00-dan 23:00-a qədər “BMT və humanitar yardım təşkilatlarının ərzaq və dərman çatdırmaq və paylamaq üçün Qəzza zolağında təhlükəsiz keçidlərini təmin etmək məqsədilə” xüsusi “təhlükəsiz marşrutlar” təyin edəcəyini qeyd edib.