Türkiyənin sığorta şirkətləri yenidən Azərbaycan bazarında fəaliyyət göstərə bilər.

Bunu "Sizinxeber.az"a açıqlamasında Türkiyə Sığorta Birliyinin Sədri Əhməd Yaşar bildirib.

O, vaxtilə Türkiyə sığortaçılarının Azərbaycanda "Günay Anadolu Sığorta", "Başak İnam Sığorta" və "AXA MBask" kimi şirkətlərdə pay sahibi olduğunu xatırladıb: "Hazırda Azərbaycanın sığorta bazarında əsasən yerli şirkətlər fəaliyyət göstərir. Bununla belə, mən hesab edirəm ki, qarşıdakı dövrlərdə bu bazara xaricilərin marağı yenidən artacaq. Türk Dünyası Sığorta Birliyi çərçivəsində əməkdaşlığın genişlənməsi, bazarların bir-birini daha yaxından tanıması və qeyri-müəyyənliklərin azalması türk investorlarının sığorta sektoruna marağını gücləndirəcək".

"Türkiyədə də uzun illər yerli investorlar sığorta şirkətlərinin yaradılmasına o qədər də maraq göstərmirdilər. Lakin son illərdə bu sahəyə marağın artdığını görürük. Eyni tendensiya Şimali Kiprdə də müşahidə olunur və burada sığorta şirkətlərinin sayı artır. Bu baxımdan, Türkiyə və Şimali Kiprdəki investorların gələcəkdə Azərbaycanda sığortaya investisiya yönəltməsi ehtimalını yüksək qiymətləndiririk", - deyə sədr əlavə edib.

Ə.Yaşar həmçinin deyib ki, hazırda Azərbaycanın işğaldan azad edilmiş ərazilərində həyata keçirilən layihələrlə bağlı sığorta xidmətindən istifadə olunur və hazırda həmin xidmətlərlə bağlı məlumat bazası yaradılır: "Hazırda əlimdə bu məsələyə dair konkret rəqəmlər yoxdur. Lakin dünən burada fəaliyyət göstərən iri tikinti şirkətlərindən birinin, hətta İtaliya şirkətinin türk meneceri ilə görüşmək imkanım oldu. Qarabağda çoxsaylı türk tikinti şirkətləri müxtəlif layihələr həyata keçirir. Bu layihələrin sığortalanması əsasən Azərbaycanda həyata keçirilsə də, Türkiyə sığorta şirkətləri də bu prosesdə dəstək rolunu oynayırlar. Lakin risklərin həcmi və tələb olunan sığorta tutumu baxımından yalnız yerli və ya türk şirkətlərinin imkanları kifayət etmir. Bu səbəbdən beynəlxalq təkrarsığorta bazarlarının imkanlarından da istifadə olunur. Türk Dünyası Sığorta Birliyi çərçivəsində hesabatlılıq sisteminin qurulması və konsolidə edilmiş məlumat bazasının yaradılması vacibdir. Bunun üçün də müvafiq məlumatların toplanması istiqamətində işlərə başlamışıq".

Oxşar xəbərlər

AMB Türkiyənin sığorta brokerini reyestrinə daxil edib

Qazaxıstanın iki sığorta brokeri Azərbaycan bazarına daxil olub

ASA: "Beynəlxalq Sığorta Konqresi və Sərgisi”ndə ilk dəfə Azərbaycanın stendi olacaq

ASA: Türk Dünyası Sığorta Birliyi yenidən formalaşdırılır

Türk Dünyası Sığorta Birliyinin ilk konqresi Şuşada keçiriləcək