Bank sığortası modeli sığorta məhsullarının daha geniş auditoriyaya çatdırılmasını təmin etməklə yanaşı, müştərilərin bu xidmətlərə daha sürətli və rahat çıxışını mümkün edir.

"Sizinxeber.az" xəbər verir ki, bunu Türkiyə Sığorta Birliyinin baş katibinin müavini Atilla Oksay XI Azərbaycan Beynəlxalq Sığorta Forumunda çıxışı zamanı deyib.

Onun sözlərinə görə, bu kanaldan istifadənin həm sığorta şirkətləri, həm banklar, həm də müştərilər üçün mühüm üstünlükləri var.

"Sığorta şirkətləri baxımından bu model ilk növbədə əvvəllər əlçatan olmayan geniş müştəri bazasına çıxış imkanı yaradır. Bankların müştərilərlə qurduğu uzunmüddətli münasibətlərdən və seqmentasiya imkanlarından faydalanmaqla onların ehtiyaclarına daha uyğun məhsullar hazırlamaq mümkün olur.

Bundan əlavə, bankların geniş filial şəbəkəsi, mobil bankçılıq tətbiqləri və rəqəmsal platformalarından istifadə sığorta şirkətlərinin əməliyyat səmərəliliyini artırır və satış imkanlarını genişləndirir.

Banklar və müştərilər baxımından isə bank sığortası modeli maliyyə xidmətlərinin şaxələndirilməsinə xidmət edir. Belə ki, banklar ənənəvi bank məhsulları ilə yanaşı sığorta həlləri də təqdim etməklə müştərilərə daha kompleks xidmət paketi təklif edə bilirlər.

Bununla belə, müştəri üçün əsas məsələ məhsulu hansı kanaldan əldə etməsi deyil, ehtiyac duyduğu xidmətə ən sürətli, rahat və əlçatan şəkildə çıxış əldə etməsidir. Banklar da bu baxımdan mühüm satış və xidmət kanallarından biri hesab olunur", - deyə o bildirib.

A.Oksayın sözlərinə görə, bu modelin uğurlu və davamlı inkişafı üçün müştəri təcrübəsinin düzgün idarə olunması xüsusi əhəmiyyət daşıyır.

"Xüsusilə kredit müraciəti zamanı müştərilərin diqqəti əsasən kredit prosesinə yönəldiyindən, təklif olunan sığorta məhsulunun təminatları, əhatə dairəsi, istisnaları və üstünlükləri onlara aydın şəkildə izah edilməlidir. Sığorta məhsulu kredit almaq üçün formal tələb kimi deyil, gələcək maliyyə risklərinin idarə olunmasına xidmət edən vacib alət kimi təqdim edilməlidir. Bu baxımdan müştərilərin düzgün və dolğun məlumatlandırılması əsas şərtlərdən biridir", – deyə A.Oksay vurğulayıb.

O əlavə edib ki, eyni prinsip sağlamlıq sığortası məhsullarına da şamil olunur: "Məhsul təqdim edilərkən gözləmə müddətləri, istisnalar, müqaviləli tibb müəssisələri və yenilənmə şərtləri barədə müştərilərə tam və dürüst məlumat verilməlidir. Bu şəffaflıq və məlumatlandırma öhdəliyi yalnız bankların deyil, sığorta məhsullarının satışında iştirak edən bütün kanalların üzərinə düşür".

Oxşar xəbərlər

Şimali Kiprin sığorta rəsmisi: "Rəqəmsallaşmaya yatırım edənlər qazanacaq"

Niyaz İsmayılov: "Azərbaycanın sığorta sektoru tam yetkinləşmə mərhələsinə hələ çatmayıb"

Azərbaycan sığortaçıları müştərilərinin tarixçələrini əldə edə biləcəklər

Azərbaycanda ən çox şikayət edilən sığorta şirkətləri açıqlanıb

Daha bir sığorta şirkəti İcbari Sığorta Bürosunun üzvlüyündən çıxarılıb