Orfoqrafiya lüğəti çox güman ki, iyun-sentyabr ayları aralığında nəşr ediləcək.

Bu barədə Sizinxeber.az-ya açıqlamasında Azərbaycan Milli Elmlər Akademiyasının İmadəddin Nəsimi adına Dilçilik İnstitutunun direktoru professor Nadir Məmmədli bildirib.

Professor bildirib ki, orfoqrafiya lüğətinin nəşr olunma müddəti bir az yubanır: “Əslində, lüğətin nəşr olunmasını may ayının sonuna planlamışdıq. Cənab Prezidentin göstərişlərindən sonra gördük ki, daha dərindən işlənilməli, bəzi sözlər çıxarılmalıdır. İlk dəfədir ki, süni intellektin köməyi ilə lüğət hazırlanır. Prosesin tam elektronlaşması da bir qədər vaxt tələb edir. Hazırda əlimizin altında iki yüz iyirmi min söz var. Həmin sözlər üzərində işlənilir, ciddi iş prosesi gedir. Bununla bağlı həftədə 3 dəfə iclas keçirilir, müzakirələr aparılır”.

Nadir Məmmədlinin sözlərinə görə, orfoepiya lüğəti baxılması üçün Nazirlər Kabinetinə təhvil verilib: “Ona görə də dəqiq nəşr tarixi məlum deyil. NK-nın qərarından sonra ola bilər ki, bəzi məsələlərə daha diqqətlə yanaşaq, dəyişiklik edək. İndi cavab gözləyirik, problem yaranmasa, artıq çapa hazırdır”.

Qeyd edək ki, orfoqrafiya lüğəti 1975, 2004, 2013 və 2021-ci illərdə nəşr edilib. Yeni lüğətin nəşri 2026-cı il üçün nəzərdə tutulub. Türkdilli dövlətlər içərisində ilk dəfə Azərbaycanda süni intellektin köməyilə orfoqrafiya lüğəti hazırlanır. Lüğətin hazırlanmasında, sözlərin seçimində tezlik sistemi istifadə edilib. Lüğətlərin nəşr edilməsi isə AMEA Rəyasət Heyətinin səlahiyyətindədir.

Oxşar xəbərlər

Azərbaycan dilinin yeni Orfoqrafiya lüğəti nəşr ediləcək

Dilçilik İnstitutunun direktoru: Nizami Cəfərovun təklif etdiyi sözlər yeni Orfoqrafiya lüğətinə salınmayacaq

Azərbaycan Dilinin Orfoqrafiya Lüğətinin hazırlanmasında ilk dəfə süni intellektdən istifadə olunur

Azərbaycan Dilinin Orfoepiya Lüğətində son tamamlama işləti aparılır, mayda nəşr ediləcək