Qazaxıstanın "KTZ Express" SC ("Kazakhstan Temir Joly” (KTJ) şirkətinin törəmə strukturu) və Çinin “Yixinou Trading Service Group Co. Ltd” (“Yixinou”) şirkəti Transxəzər Beynəlxalq Nəqliyyat Marşrutu (TBNM, Orta Dəhliz) ilə konteyner daşımalarının inkişaf perspektivlərini müzakirə ediblər.

Bu barədə “Report” KTJ-yə istinadən xəbər verir.

"Astanada “KTZ Express”in rəhbərliyi ilə “Yixinou” nümayəndələri arasında görüş keçirilib. Avropa İttifaqı və Mərkəzi Asiya ölkələrinə TBNM ilə konteyner daşımalarının inkişaf perspektivləri əsas müzakirə mövzusu olub", - məlumatda qeyd olunur.

KTJ-nin məlumatına görə, strateji mövqeyi və inkişaf etmiş nəqliyyat infrastrukturu sayəsində beynəlxalq logistika və ticarətin əsas mərkəzi olan Çinin Çjetsyan əyalətindən daşımaların həcminin artırılması məsələlərinə xüsusi diqqət yetirilib.

"Danışıqların sonunda strateji əməkdaşlığa dair saziş imzalanıb. Sənəd konteyner daşımalarının həcminin artırılması və əsas marşrutların inkişafı ilə bağlı birgə təşəbbüslərin həyata keçirilməsini nəzərdə tutur", - məlumatda bildirilir.

“Yixinou” Çin-Avropa marşrutunda konteyner qatarlarının logistika platformasının yeganə özəl operatorudur.

Xatırladaq ki, Orta Dəhliz kimi tanınan Transxəzər Beynəlxalq Nəqliyyat Marşrutu Çin, Qazaxıstan, Azərbaycan, Gürcüstan və Türkiyədən keçməklə Avropa ölkələrinə qədər uzanır.

Oxşar xəbərlər

Orta Dəhlizlə bu il konteyner daşımaları 3 dəfə artıb

KTZ: Bu ilin əvvəlindən Orta Dəhlizlə 300-cü konteyner qatarı yola salınıb

Orta Dəhliz vasitəsilə konteyner yükdaşımaları 14 dəfə artıb

Orta Dəhlizlə yük daşımalarının həcmi 63 % artıb

Qazaxıstan və Çin 2030-cu ilədək Orta Dəhlizlə yükdaşımaların proqnozlaşdırılan həcmini razılaşdırıb