Azərbaycanda problemli girovların yaranmasının əsas səbəblərindən biri qiymətləndirmə hesabatlarının lazımi səviyyədə təhlil edilməməsidir.

"Report" xəbər verir ki, bunu Azərbaycan Qiymətləndiricilər Palatasının (AQP) sədri Nüsrət İbrahimov mətbuat konfransında deyib.

Onun sözlərinə görə, bir çox hallarda banklar girov predmetləri üzrə təqdim olunan qiymətləndirmə hesabatlarının yalnız yekun dəyərinə diqqət yetirirlər, halbuki hesabatın digər hissələri də risklərin qiymətləndirilməsi baxımından mühüm əhəmiyyət daşıyır: "Qiymətləndirici hesabat hazırlayır, bank isə əksər hallarda yalnız qiymət göstəricisinə baxır. Halbuki hesabatın beynəlxalq standartlara uyğunluğu, risk faktorları, ekoloji göstəricilər və digər vacib məqamlar da nəzərə alınmalıdır. Kredit portfellərində yaranan bəzi problemlərin kökündə məhz düzgün aparılmayan qiymətləndirmə və ya qiymətləndirmə hesabatlarının tam təhlil olunmaması dayanır. Banklarda girov portfelləri ilə bağlı yaranan problemlərin bir hissəsi məhz qiymətləndirmədən qaynaqlanır. Təklif edirik ki, sistem elə qurulsun ki, bu problemlər sonradan deyil, ilkin mərhələdə aradan qaldırılsın".

N. İbrahimov bildirib ki, bu məqsədlə Azərbaycan Banklar Assosiasiyası və ayrı-ayrı banklarla müzakirələr aparılır: "Palata qiymətləndirmə hesabatlarının vahid standartlar əsasında hazırlanması və qəbul olunması ilə bağlı təkliflər təqdim edib. Yeni beynəlxalq qiymətləndirmə standartları çərçivəsində ekoloji, sosial və idarəetmə (ESG) faktorlarının nəzərə alınması gələcəkdə daha da aktuallaşacaq və bankların risk idarəetmə sistemlərinə inteqrasiya edilməlidir".

Oxşar xəbərlər

Azərbaycanda çoxfunksiyalı qiymətləndirici portal yaradılır

Nüsrət İbrahimov: "Bəzi dövlət qurumları statistik məlumatlarını paylaşmırlar"

Nüsrət İbrahimov: "Qiymətləndirmə iqtisadiyyatın “gözüdür”

Nüsrət İbrahimov: "Qiymətləndiricilər Palatası dövriyyədən kənarda qalan böyük kütlənin bazara cəlb edilməsini planlaşdırır"

Nüsrət İbrahimov: “Bakıda köhnəlmiş və qəzalı binaların yenilənməsi sosial ədaləti təmin edəcək”