ASK-nın Baş katibi: Özəl sektor "COP29-da Yaşıl Bölgə" mövzusunda əsas oyunçulardandır

Özəl sektor "COP29-da Yaşıl Bölgə" mövzusunda əsas oyunçulardan biridir.

"Report" xəbər verir ki, bunu Azərbaycan Sahibkarlar (İşəgötürənlər) Təşkilatları Milli Konfederasiyasının (ASK) Baş katibi Natəvan Məmmədova QHT-lərə Dövlət Dəstəyi Agentliyinin təşkilatçılığı ilə COP29 Azərbaycan Əməliyyat Şirkəti tərəfindən Azərbaycan QHT-ləri üçün "COP29-da Yaşıl Bölgə" ilə əlaqədar məlumat sessiyasında jurnalistlərə açıqlamasında deyib.

O bildirib ki, COP29 tədbiri çərçivəsində sözügedən sektorun rolu danılmazdır:

"Yaşıl maliyyə, karbon emissiyalarının neytrallaşdırılması, karbon vergiləri, yeni investisiyalar özəl sektorun hazırlıqlı olmasını tələb edən məqamlardır. Bu səbəbdən biz də çalışırıq ki, öz sektorumuzu daim məlumatlandıraq".