UEFA Çempionlar Liqasının finalında PSJ-nin qələbəsindən sonra Fransada baş verən iğtişaşlarda azı 12 nəfər yaralanıb.

"Report"un məlumatına görə, bu barədə "Le Figaro" qəzeti xəbər verib.

Qəzetin məlumatına görə, yaralananlar arasında səkkiz polis əməkdaşı da var. Agen şəhərində yeddi polis əməkdaşı xəsarət alıb, Parisdəki Port-Mayo yaxınlığında isə bir polis əməkdaşını avtomobil vurub sürücü hadisə yerindən yayınıb.

Hüquq-mühafizə orqanlarındakı mənbə qəzetə bildirib ki, azarkeşlərin toplaşdığı Paris dairəvi yolunda baş verən avtomobil qəzasından sonra iki nəfərin vəziyyəti ağırdır. Respublika meydanı yaxınlığında daha bir nəfər bıçaqlanıb. Bir qadının da ürək tutmasından sonra reanimasiyada olduğu bildirilir.

"Le Figaro" qəzetinin məlumatına görə, ölkə daxilində iğtişaşlar zamanı 416 nəfər, o cümlədən Parisdə 283 nəfər saxlanılıb.

04:21

Budapeştdə keçirilən Çempionlar Liqasının finalı zamanı Parisdə baş verən iğtişaşlarda iştirak edən azı 140 nəfər saxlanılıb.

"Report"un məlumatına görə, bu barədə BFMTV telekanalı xəbər verib.

Telekanalın məlumatına görə, hüquq-mühafizə orqanlarının əməkdaşları 2 216 yoxlamadan sonra 89 cərimə tətbiq edib, təxminən 100 ədəd pirotexniki vasitə müsadirə ediblər.

"Le Figaro" qəzeti bir polisin yaralandığını xəbər verib. Parisin "Park de Prens" stadionunun yerləşdiyi XVI dairə çörək sexi və bir restoran da zərər görüb.

Qəzetin məlumatına görə, Yelisey küçəsində altı avtomaşın və bir qəzet köşkü yandırılıb. Polis təxminən 1 000 nəfəri saxlayıb, iğtişaşçılar isə icarəyə götürülmüş velosipedlərdən istifadə edərək barrikadalar qururlar. Hüquq-mühafizə orqanlarının əməkdaşları vaxtaşırı göz yaşartıcı qazdan istifadə edirlər.

PSJ-nin Çempionlar Liqasındakı qələbəsindən sonra Parisdə baş verən iğtişaşlar zamanı dörd nəfər yaralanıb. "Le Figaro" qəzetinin hüquq-mühafizə orqanlarındakı mənbəyə istinadən məlumatına görə, Parisin 11-ci dairəsində Respublika meydanı yaxınlığında bir nəfər bıçaqlanıb. Digər zərərçəkən isə 5-ci dairədəki Sen-Bernard sahilində Sena çayına düşüb.

Bundan əlavə, skuter sürən iki nəfər çox sayda azarkeşin gəzdiyi Paris dairəvi yolunda beton maneəyə çırpılıb.

Şəhərdə iğtişaşların davam etdiyi qeyd olunur: XVI dairədə İena prospektində səfirliyin yaxınlığındakı tikinti qoşqusu yandırılıb. Qəzet hansı diplomatik nümayəndəliyə istinad edildiyini dəqiqləşdirmir.

30 may, 23:59

Futbol azarkeşləri Parisin XVI dairəsində PSJ-nin ev oyununu keçirdiyi "Park de Prens" stadionunun yaxınlığında iğtişaşlar törədiblər.

"Report"un məlumatına görə, bu barədə "Le Figaro" qəzeti xəbər verib.

Qəzetin məlumatına görə, xuliqanlar hüquq-mühafizə orqanlarının əməkdaşlarına daş və butulkalar, fişənglər atıblar. Polis buna göz yaşardıcı qazdan istifadə edib.

Hüquq-mühafizə orqanlarındakı mənbənin məlumatına görə, iğtişaşlarla bağlı 10 nəfər saxlanılıb.

Oxşar xəbərlər

Parisdə PSJ-nin qələbəsindən sonrakı iğtişaşlar zamanı dörd nəfər yaralanıb - YENİLƏNİB

Parisdə PSJ azarkeşləri iğtişaşlar törədib, saxlanılanlar var

Los-Ancelesdə etiraz aksiyaları zamanı iki polis əməkdaşı yaralanıb

Serbiyada etiraz aksiyaları zamanı 6 polis əməkdaşı yaralanıb

ABŞ-də əyləncə parkındakı iğtişaşlar zamanı iki polis xəsarət alıb