İtaliyanın xarici işlər naziri Antonio Tayani Rusiya ilə diplomatik dialoqun mümkünlüyünü istisna etməyib - bir şərtlə ki, Moskva müharibəni başa çatdırmaq niyyətini real addımlarla təsdiq etsin.

"Report"un Avropa bürosunun məlumatına görə, Tayani bu barədə Brüsseldə Aİ Xarici İşlər Şurasının iclası öncəsi jurnalistlərə açıqlama verib.

"Biz heç vaxt Rusiya ilə müharibə vəziyyətində olmamışıq və indi də deyilik. Biz yalnız Ukraynanın öz müstəqilliyinə olan hüququnu müdafiə etmişik", - o deyib.

Bununla yanaşı, Tayani Romanın Moskva ilə mümkün yaxınlaşmaya ehtiyatlı yanaşmasına diqqət çəkib.

"Rusiyanın real niyyətlərinin nə olduğunu anlamaq lazımdır. Əgər Putinin dedikləri doğrudursa, aydındır ki, bundan sonra dialoq mərhələsinə başlamaq lazım olacaq", - o sözlərin ardınca konkret addımların atılacağına ümid ifadə edərək qeyd edib.

Tayani həmçinin bildirmək istəyib ki, Avropa vasitəçisinin seçimi və sanksiyaların ləğvi məsələsi Moskvanın deyil, Avropa İttifaqının özünün səlahiyyətidir.

"Sanksiyaların aradan qaldırılması üçün Avropa İttifaqının qərarı tələb olunacaq. Üzv dövlətlər, Avropa Komissiyası və Aİ Şurası bunu birgə qiymətləndirəcək", - o qeyd edib.

Xarici işlər naziri həmçinin vurğulayıb ki, İtaliyanın baş naziri Corcia Meloni mümkün danışıqlarda Avropa vasitəçisi roluna "nüfuzlu namizəd" ola bilər.

Oxşar xəbərlər

Tayani: Fələstin İsraili tanımasa, münaqişə həll olunmayacaq

Tayani: İtaliya Hörmüz boğazında Aİ-nin dəniz missiyasının genişləndirilməsinə etiraz edir

Tayani: İtaliya yalnız öz milli maraqlarını müdafiə edəcək

Tayani: Meloninin Azərbaycana səfəri münasibətlərin gücləndirilməsində əsas mərhələdir - EKSKLÜZİV

Tayani Yaxın Şərqdə gərginliyin dərhal azaldılmasına çağırıb