İtaliya Azərbaycanla münasibətlərin daha da gücləndirilməsinə ümid edir və Baş nazir Corcia Meloninin mayın əvvəlində Bakıya səfərini Roma ilə Bakı arasında ikitərəfli əməkdaşlığın inkişafında əsas mərhələ kimi görür.

Bu barədə "Sizinxeber.az"un Avropa bürosuna İtaliyanın xarici işlər naziri Antonio Tayani Lüksemburqda Avropa İttifaqı xarici işlər nazirlərinin görüşü çərçivəsində bildirib.

"Azərbaycan bizim üçün vacibdir. Biz bu ölkə ilə əməkdaşlığı fəal şəkildə inkişaf etdirmək niyyətindəyik. Baş nazirin səfəri böyük əhəmiyyət daşıyır", - Tayani deyib.

Onun sözlərinə görə, Roma artıq Bakı ilə əməkdaşlığın genişləndirilməsi istiqamətində, o cümlədən sosial-iqtisadi sahədə iş aparır.

"Biz əməkdaşlığın gücləndirilməsi üçün ciddi səylər göstəririk. Azərbaycan bizim dostumuzdur və bu tərəfdaşlığın daha da inkişafı vacibdir", - nazir vurğulayıb.

İtaliya Avropada Azərbaycanın əsas ticari-iqtisadi tərəfdaşlarından biridir, həmçinin enerji sahəsində də. Roma enerji resurslarının tədarükünün diversifikasiyası və Xəzər regionundan olan təchizatçılarla əlaqələrin gücləndirilməsində maraqlıdır.

Meloninin mayın əvvəlinə planlaşdırılan səfərinin iqtisadi əməkdaşlıq, enerji və regional təhlükəsizlik məsələlərinə həsr olunacağı gözlənilir.

Oxşar xəbərlər

Tayani: İtaliya yalnız öz milli maraqlarını müdafiə edəcək

Tayani: İtaliya Hörmüz boğazında Aİ-nin dəniz missiyasının genişləndirilməsinə etiraz edir

Tayani: Fələstin İsraili tanımasa, münaqişə həll olunmayacaq

"Euronews": Ciorcia Meloni enerji əlaqələrini gücləndirmək üçün Azərbaycana səfər edəcək

Ceyhun Bayramov İtaliyanın xarici işlər və beynəlxalq əməkdaşlıq naziri Antonio Tayani ilə görüşüb