Azərbaycan Ali Məhkəməsinin sədr müavini Çingiz Əsgərovun rəhbərlik etdiyi nümayəndə heyəti Şimali Makedoniyanın paytaxtı Skopye şəhərində keçirilən Mərkəzi və Şərqi Avropa ölkələrinin Ali Məhkəmə sədrlərinin konfransında iştirak edib.

Bu barədə "Report"a Ali Məhkəmədən məlumat verilib.

Bildirilib ki, konfransda məhkəmələrə ictimai etimadın artırılması, məhkəmə müstəqilliyinin təmin edilməsi, məhkəmə proseslərində və məhkəmə aparatının fəaliyyətində süni intellekt texnologiyalarının hazırkı və gələcək tətbiqi, habelə məhkəmələrin ictimaiyyəti narahat edən məsələlərə münasibəti ilə bağlı geniş fikir mübadiləsi aparılıb.

Gündəlikdə duran məsələlərlə bağlı çıxış edən Çingiz Əsgərov Azərbaycanda həyata keçirilən hüquqi islahatlar, Ali Məhkəmənin və Məhkəmə-Hüquq Şurasının fəaliyyəti, eləcə də məhkəmə sisteminin müasirləşdirilməsi istiqamətində görülən işlər barədə ətraflı məlumat verib.

Konfrans çərçivəsində iştirakçılar müxtəlif ölkələrin məhkəmə sistemlərində həyata keçirilən islahatlar, rəqəmsallaşma prosesləri və ədalət mühakiməsinin səmərəliliyinin artırılması istiqamətində əldə olunan nəticələr barədə təcrübə mübadiləsi aparıblar. Müzakirələr zamanı müasir dövrdə məhkəmə hakimiyyətinin qarşısında duran çağırışlar, ictimai etimadın gücləndirilməsi və yeni texnologiyaların tətbiqi məsələlərinə xüsusi diqqət yetirilib.

Qeyd edək ki, Mərkəzi və Şərqi Avropa ölkələrinin Ali Məhkəmə sədrlərinin Konfransı 2011-ci ildən etibarən keçirilir və region ölkələrində aparılan məhkəmə islahatlarının müzakirəsi, habelə qabaqcıl təcrübələrin paylaşılması üçün mühüm beynəlxalq platforma rolunu oynayır.

Oxşar xəbərlər

Səmərqənddə TDT-yə üzv dövlətlərin Məhkəmə Şuraları Sədrlərinin 4-cü iclası keçirilib

Məhkəmələrdə kargüzarlığın aparılmasına dair təlimat layihəsi təsdiq edilib

Azərbaycan və Keniya arasında məhkəmə-hüquq sahəsində əməkdaşlıq müzakirə edilib

Türkiyə və Azərbaycan arasında məhkəmə sahəsində fikir mübadiləsi aparılıb

Azərbaycan və Türkiyənin məhkəmə sahəsində əməkdaşlığı müzakirə edilib