Şalva Papuaşvili: Sərt qərarlar olmasaydı, Gürcüstan Ukrayna ilə eyni vəziyyətdə ola bilərdi

Əgər Gürcüstan hökuməti 2022-ci ilin əvvəlində sərt və prinsipial qərarlar qəbul etməsəydi, bu gün ölkə Ukrayna ilə eyni vəziyyətdə ola bilərdi.

"Report"un Gürcüstan bürosu xəbər verir ki, bu sözləri ölkə parlamentinin sədri Şalva Papuaşvili jurnalistlərə açıqlamasında deyib.

O, keçmiş Baş nazir İrakli Qaribaşvilinin fəaliyyəti ilə bağlı danışaraq bildirib ki, onun rəhbərliyi dövründə daxili və xarici təzyiqlərə qarşı ciddi müqavimət göstərilib.

“Biz Qaribaşviliyə qarşı daxildən və xaricdən hücumların, təzyiqlərin şahidi olduq. Xüsusilə, Bayden administrasiyasının sabiq səfirinin Gürcüstanı Rusiya ilə qarşıdurmaya sürükləmək cəhdləri oldu. Amma bu təzyiqlərə tab gətirən hökumət sayəsində biz müharibədən və dağıntıdan yayınmağı bacardıq”, – Papuaşvili vurğulayıb.

Onun sözlərinə görə, 2022-ci ilin fevralında – Rusiya-Ukrayna müharibəsinin ilk günlərində Gürcüstanda bəzi qruplar hökumətə təzyiq edərək xarici dövlətlərin bayraqları altında hərəkətə keçməyi tələb edirdilər: “Əgər onların ardınca getsəydik, cəmi bir neçə həftə sonra Ukraynanın bugünkü vəziyyətində olacaqdıq”.

Parlament sədri əlavə edib ki, ölkədə sülhün qorunması və gənclərin müharibədən uzaq tutulması məhz “Gürcü Arzusu” partiyasının liderliyində həyata keçirilən siyasi kursun nəticəsidir.