2025-ci il Gürcüstanda turizm gəlirləri baxımından rekord il olub.

"Report"un yerli bürosunun məlumatına görə, bunu Gürcüstanın Baş naziri İrakli Kobaxidze parlamentdə hökumətin illik fəaliyyət hesabatını təqdim edərkən deyib.

Onun sözlərinə görə, ötən il ölkənin turizm gəlirləri 4,7 milyard ABŞ dollarına çatıb.

Baş nazir bildirib ki, 2025-ci ildə Gürcüstana ümumilikdə 7,8 milyon beynəlxalq səyahətçi gəlib. Onlardan 5 milyon 522 mini turist səfərlərinin payına düşüb ki, bu da əvvəlki illə müqayisədə 8,4 % artım deməkdir.

İ.Kobaxidze qeyd edib ki, Yaxın Şərqdəki münaqişənin turizm axınına təsir göstərməsinə baxmayaraq, 2026-cı ilin birinci rübündə turizm gəlirləri ötən ilin eyni dövrü ilə müqayisədə 0,5 % artıb.

Baş nazirin sözlərinə görə, həmin dövrdə Gürcüstanın hava limanları 1,6 milyondan çox sərnişinə xidmət göstərib ki, bu da illik müqayisədə 4,3 % çoxdur. Birinci rübdə ölkə hava limanlarında 7 800 aviareys həyata keçirilib.

İ.Kobaxidze əlavə edib ki, hesabat dövründə ölkədə təxminən 1 000 otaqdan ibarət 20 yeni otel istifadəyə verilib. Hazırda Gürcüstanda ümumilikdə 53 min otağa malik 2 691 otel fəaliyyət göstərir.

Baş nazir vurğulayıb ki, Gürcüstanın İqtisadiyyat Nazirliyi ölkənin strateji turizm bazarlarında marketinq fəaliyyətini davam etdirir.

Oxşar xəbərlər

AZAL Gürcüstan aviasiya bazarında ilk beşlikdə yer alıb

Gürcüstan turizm gəlirlərini 7 %-dən çox artırıb

Azərbaycan ötən il Gürcüstanın turizm gəlirlərində 4 % paya malik olub

Gürcüstanın strateji valyuta ehtiyatları rekord həddə çatıb

Gürcüstanın birinci rübdə azərbaycanlı turistlərdən gəlirləri 48 milyon dolları ötüb