Tramp Qətər əmiri ilə Ukraynadakı münaqişənin nizamlanmasını müzakirə edib

ABŞ Prezidenti Donald Tramp Doha şəhərində keçirilən danışıqlar zamanı Qətər əmiri Şeyx Təmim bin Həməd Əl-Tani ilə Rusiya-Ukrayna münaqişəsinin sülh yolu ilə nizamlanmasını müzakirə edib.

“Sizinxeber.az” xarici KİV-ə istinadən xəbər verir ki, bu barədə Amerika lideri Qətərlə bir sıra sazişlər imzaladıqdan sonra bildirib.

“Bir neçə saatlıq çox maraqlı söhbət oldu. Biz sülhü müzakirə etdik. Biz sizin bir çox sahədə böyük kömək etdiyiniz Rusiya və Ukrayna münaqişəsini müzakirə etdik. Çox maraqlı vəziyyətin yarandığı İranı da müzakirə etdik. Məndə elə bir hiss var ki, hər şey bu və ya digər şəkildə düzələcək”, - Tramp söyləyib.

Qeyd edək ki, mayın 14-də daha əvvəl Tramp və Qətər Əmiri ikitərəfli əməkdaşlıq haqqında bəyannamə imzalayıblar. ABŞ və Qətər müdafiə sahəsində əməkdaşlığa dair niyyət memorandumu, eləcə də ərəb dövlətinin “Qatar Airways” üçün 200 milyard dollara 160 ədəd “Boeing” təyyarəsi alacağına dair aviasiya sazişi imzalayıb. “Bu, “Boeing”in tarixindəki ən böyük təyyarə sifarişidir”, - ABŞ Prezidenti deyib.