Fon der Lyayen: Avropa Müdafiə İttifaqını qurmağın vaxtı çatıb

Avropa sülh içində yaşamaq istəyir, lakin Avropa təhlükəsizlik nizamı sarsılır və bir çox illüziyalar dağılır. Buna görə də qitədə sülhü təmin edəcək Avropa Müdafiə İttifaqını qurmağın vaxtı çatıb.

“Report” xəbər verir ki, bunu Avropa Komissiyasının sədri Ursula fon der Lyayen Avropa İttifaqı Şurası və Avropa təhlükəsizliyi iclasları çərçivəsində Avropa Parlamentinin plenar iclasında birgə müzakirələr zamanı bildirib.

"Biz Avropa təhlükəsizliyi böhranı ilə üzləşmişik. Məhz böhranlar dövründə Avropanın qurulduğunu bilirik. Buna görə də indi güc vasitəsilə sülh üçün vaxt çatıb", - o qeyd edib.

Onun sözlərinə görə, ötən günlərdə keçirilən fövqəladə Avropa İttifaqı sammitində tərəflər Avropa müdafiəsi üzrə yüksək səviyyədə konsensus nümayiş etdiriblər.