Ukrayna üzrə növbəti danışıqlar turu gələn həftə Londonda keçiriləcək

Fransanın xarici işlər naziri Jan-Noel Barro bəyan edib ki, Ukraynada müharibənin dayandırılması ilə bağlı növbəti danışıqlar raundu gələn həftə Londonda baş tutacaq.

APA "Azadlıq Radiosu"na istinadən xəbər verir ki, bu barədə Barro Parisdə ABŞ, Fransa, Böyük Britaniya, Almaniya və Ukrayna nümayəndələrinin görüşündən sonra məlumat verib.

“Bu açıq və səmimi müzakirələr Avropa ölkələrinin, ukraynalıların və amerikalıların mövqelərinin yaxınlaşmasına kömək etdi. Tərəflər gələn həftə Londonda növbəti dəfə bir araya gəlmək barədə razılığa gəldilər”, – deyə fransalı diplomat vurğulayıb.

Barro vurğulayıb ki, baş tutan danışıqlar və qarşıdakı görüş Avropanın danışıqlar masasındakı yerini təsdiqləyir.

"“Uzun müddət Avropanın danışıqlarda iştirak etməyəcəyinə dair narahatlıqlar vardı – lakin bu gün məhz Parisdə avropalılar, amerikalılar və ukraynalılar ilk dəfə olaraq bir araya gəldilər”, - nazir qeyd edib.