Azərbaycan millisinin futbolçusu: "Rusiya çempionatında turun rəmzi komandasına düşmək sevindirici haldır"

Azərbaycan millisinin futbolçusu Nigar Mirzəliyeva Rusiya Qadınlar Liqasında VIII turun rəmzi komandasına seçilməsini sevindirici hal adlandırıb.

Bunu "Sizinxeber.az"a açıqlamasında 23 yaşlı müdafiəçi bildirib.

O, "Rubin"ə qalib gəldikləri matçda yaxşı oynadığını söyləyib:

"Məhz buna görə rəmzi "11-lik"də yer almışam".

Oyunçu Sankt-Peterburq təmsilçisindəki əsas hədəflərindən də söz açıb:

"Hazırda çempionat davam edir. Hər həftə çətin oyunlarımız olur. Bu mövsüm tam başqadır. Bütün klublarla rəqabət aparmaq mümkündür. Amma düşünürəm ki, yenə çempion olacağıq. Bunun üçün növbəti matçlara da ciddi hazırlaşırıq".

N.Mirzəliyeva Azərbaycan yığmasının mayın 30-da Millətlər Liqasının qrup mərhələsində Litvaya qarşı keçirəcəyi matça da toxunub:

"Qələbə qazanmağa çalışacağıq. Növbəti mərhələyə vəsiqə əldə etmək üçün maksimum çox qol vurmaq lazımdır. Düşünürəm ki, komandamız bunu bacaracaq".

Qeyd edək ki, "Zenit" Rusiya Qadınlar Liqasında 8 turdan sonra 17 xalla 13 komanda arasında üçüncü pillədə qərarlaşıb. Nigar Mirzəliyeva bu komanda ilə iki dəfə Rusiya çempionu olub.