Kanada millisinin yarımmüdafiəçisi İsmayıl Kone futbol üzrə dünya çempionatının qrup mərhələsinin II turunda Qətər yığmasına qarşı keçirilən oyunda ciddi zədə alıb.

"Sizinxeber.az" xəbər verir ki, Vankuverdə keçirilən qarşılaşmanın 52-ci dəqiqəsində, hesab 3:0 Kanada komandasının xeyrinə olarkən, Qətər millisinin müdafiəçisi Asim Madibo Koneyə qarşı kobud qayda pozuntusuna yol verib.

Bundan sonra həkimlər dərhal meydana daxil olaraq futbolçuya ilkin yardım göstərib.

Zədənin ağırlığı səbəbindən Kone meydanı xərəkdə tərk edib. Hadisədən sonra futbolçular arasında gərginlik yaşanıb və qısa müddətli qarşıdurma baş verib.

Kanada yığmasının bəzi üzvləri zədə alan komanda yoldaşına görə göz yaşlarını saxlaya bilməyiblər. Zədənin həddən artıq ciddi olması ehtimal edilir. Çünki qayda pozuntusundan sonra matçın yayımı zamanı epizodun təkrarının göstərilməməsi qərara alınıb.

Baş hakim qayda pozuntusuna görə Madibonu birbaşa qırmızı vərəqə ilə meydandan kənarlaşdırıb. Qətər millisi oyunu doqquz nəfərlə davam etdirmək məcburiyyətində qalıb. Belə ki, bundan əvvəl komandanın digər üzvü Homam Əl-Əmin də qırmızı vərəqə alaraq meydandan qovulmuşdu.

İsmayıl Konenin zədəsinin nə yerdə olduğu hələlik açıqlanmayıb.

Qeyd edək ki, ABŞ, Kanada və Meksikanın birgə ev sahibliyi etdiyi dünya çempionatı iyulun 19-da başa çatacaq.

Oxşar xəbərlər

Kanada millisinin baş məşqçisi vəzifəsindən kənarlaşdırılıb

"Real"ın kapitanı ciddi zədə alıb

Kanada - Bosniya və Herseqovina oyununun ən yaxşı futbolçusu açıqlanıb

Kanada hakimiyyəti Qana millisinin futbolçusuna cinayət ittihamına görə viza verməyib

"Beşiktaş" klubunun futbolçusu ciddi zədə alıb