Rusiya hakimiyyətinin Yekaterinburqda azərbaycanlılara qarşı zorakılığı Sovet İttifaqı dövründə Stalin repressiyalarını xatırladır.

Bunu "Report"a açıqlamasında amerikalı politoloq, beynəlxalq münasibətlər üzrə ekspert Piter Teys deyib.

Onun sözlərinə görə, bu təcavüz aktları dərin hiddət və ciddi narahatlıq doğurur; Yekaterinburq faktiki olaraq anti-Azərbaycan əhval-ruhiyyəsinin mərkəzinə çevrilib.

"Ədalət bəhanəsi ilə törədilən bu cür hərəkətlər getdikcə daha çox tarixin qaranlıq səhifələrini - Stalin rejiminin Azərbaycan xalqına qarşı repressiyalarını xatırladır. Sovet rejiminin dəhşətli cinayətlərinin kulminasiya nöqtəsi 1990-cı il 20 Yanvar faciəsi, silahsız mülki əhalinin Bakıda gülləbaran edilməsi idi. Otuz beş il sonra indiki Rusiya rejiminin törətdiyi bu düşmənçilik hərəkətləri bizə bir daha Azərbaycanın nəcib xalqına qarşı qəddar sovet rejiminin cinayətlərini xatırladır”, - P. Teys vurğulayıb.

Ekspert qeyd edib ki, bu hadisələr fonunda Rusiya tərəfinin Azərbaycanla “strateji tərəfdaşlıq”dan danışması reallıqla heç bir əlaqəsi olmayan fars kimi görünür.

Xatırladaq ki, iyunun 27-də səhər saatlarında Rusiya Federal Təhlükəsizlik Xidmətinin əməkdaşları Yekaterinburqda azərbaycanlıların evlərinə basqın edib. Reyd zamanı iki nəfər öldürülüb, bir neçə nəfər yaralanıb. Öldürülən azərbaycanlılar tanınmış jurnalist Seyfəddin Hüseynlinin qardaşlarıdır.

İyunun 28-də Azərbaycanın Xarici İşlər Nazirliyi (XİN) bəyanat yayaraq, “bu yolverilməz zorakılıq aktı”na görə təqsirli bilinən şəxslərin istintaqa cəlb edilməsini və məsuliyyətə cəlb olunmasını tələb edib. Bundan sonra Rusiyanın müvəqqəti işlər vəkili Azərbaycanın Xarici İşlər Nazirliyinə çağırılıb və hadisə ilə bağlı ona sərt etiraz edilib.

Oxşar xəbərlər

Elman Nəsirov: Azərbaycan Rusiyaya qarşı sanksiyalara qoşulmayıb, amma zərbələr alır

Piter Teys: Fransa olimpiadada onsuz da sarsılmış imicini itirir

Aygün Attar: Faşist Putin hakimiyyətini pisləyirik

"Haber Global"da Yekaterinburqda azərbaycanlılara qarşı vəhşiliklərlə bağlı müzakirələr təşkil edilib

Latviya Seyminin deputatı: 1990-cı ildə Bakıda törədilmiş qırğın SSRİ-nin dağılması üçün mühüm katalizator oldu