Azərbaycan Ordusu bu gün təkcə ölkəmizin təhlükəsizliyinin qarantı deyil, həm də dövlətimizin müstəqilliyinin, suverenliyinin və milli qürurunun təcəssümüdür.

Bunu Sizinxeber.az-ya açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev bildirib.

Parlamentin komitə sədri deyib ki, müstəqillik əldə etdikdən sonra Azərbaycan çox mürəkkəb təhlükəsizlik çağırışları ilə üzləşib: “Lakin məqsədyönlü dövlət siyasəti, güclü siyasi iradə və xalq–ordu birliyi nəticəsində Silahlı Qüvvələrimiz regionun ən güclü ordusuna çevrildi. Bu gün Azərbaycan Ordusunun əldə etdiyi nailiyyətlər təkcə ölkəmizdə deyil, beynəlxalq hərbi ekspert dairələrində də böyük maraq doğurur”.

Heydər Əliyevin müəyyənləşdirdiyi strateji xətt

Arzu Nağıyev qeyd edib ki, Azərbaycan Ordusunun bugünkü qüdrətinin əsasında Ümummilli Lider Heydər Əliyevin müəyyən etdiyi strateji xətt dayanır:

“Milli Ordu quruculuğundan danışarkən ilk növbədə Ulu Öndər Heydər Əliyevin xidmətlərini xüsusi vurğulamaq lazımdır. Hələ sovet dövründə Azərbaycanda milli hərbi kadrların hazırlanması istiqamətində atılan addımlar, Cəmşid Naxçıvanski adına Hərbi Məktəbin yaradılması, azərbaycanlı zabitlərin yetişdirilməsi gələcək müstəqil dövlətimizin Silahlı Qüvvələrinin formalaşması üçün mühüm baza yaratdı. 1993-cü ildə Heydər Əliyevin hakimiyyətə qayıdışından sonra isə nizami ordu quruculuğu prosesi yeni mərhələyə qədəm qoydu. Ölkədə pərakəndə silahlı dəstələr ləğv edildi, vahid komandanlıq sistemi yaradıldı, dövlətin hərbi təhlükəsizlik siyasəti formalaşdırıldı. Məhz həmin dövrdə Azərbaycan Ordusu ilk ciddi uğurlarını qazandı və dövlətçiliyimizin qorunmasında həlledici rol oynadı”.

Deputat vurğulayıb ki, Prezident, Silahlı Qüvvələrin Ali Baş Komandanı İlham Əliyev tərəfindən bu siyasət yeni dövrün çağırışlarına uyğun şəkildə davam etdirilib:

“Son iyirmi ildən artıq müddətdə ordu quruculuğu dövlət siyasətinin əsas prioritetlərindən biri olub. Müdafiə xərclərinin artırılması, ən müasir silah və texnikaların alınması, peşəkar kadr hazırlığının gücləndirilməsi, beynəlxalq əməkdaşlığın genişləndirilməsi nəticəsində Azərbaycan Ordusu keyfiyyətcə tamamilə yeni mərhələyə yüksəlib”.

Rregionun ən güclü Ordusu

Arzu Nağıyevin sözlərinə görə, bu gün Azərbaycan Ordusu yalnız Cənubi Qafqazın deyil, daha geniş coğrafiyada ən güclü silahlı qüvvələrdən biri hesab olunur: “Müxtəlif beynəlxalq reytinqlərdə Azərbaycan Ordusunun yüksək yerlərdə qərarlaşması təsadüfi deyil. Bu göstəricilər ordumuzun şəxsi heyətinin hazırlıq səviyyəsini, texniki təminatını, əməliyyat imkanlarını və döyüş qabiliyyətini əks etdirir. Lakin Azərbaycan Ordusunun əsas üstünlüyü yalnız texniki göstəricilər deyil. Əsas üstünlük peşəkar insan resursu, yüksək vətənpərvərlik ruhu, döyüş təcrübəsi və güclü komandanlıq sistemidir. Müasir müharibələrin nəticəsini yalnız texnologiya deyil, insan faktoru müəyyən edir və Azərbaycan bu baxımdan çox güclü potensiala malikdir”.

Azərbaycan Ordusu paradlarda deyil, döyüş meydanında öz sözünü deyib

Parlamentin komitə sədri bildirib ki, bəzi ölkələrdə güclü görünən ordular real döyüş şəraitində gözlənilən nəticələri göstərə bilmədiyi halda, Azərbaycan Ordusu öz gücünü məhz müharibə meydanında sübut edib: “2020-ci ilin Vətən müharibəsi dünya hərb tarixinə düşən hadisələrdən biridir. Azərbaycan Ordusu cəmi 44 gün ərzində təxminən 30 il davam edən işğala son qoydu. Bu, sadəcə hərbi qələbə deyil, beynəlxalq hüququn və tarixi ədalətin bərpası idi. Bu gün dünyanın ən güclü hesab olunan bəzi ordularının iştirak etdiyi müharibələr illərlə davam edir və konkret nəticələr vermir. ABŞ və Rusiyanın da iştirak etdiyi müxtəlif münaqişələr göstərir ki, müasir müharibələrdə qəti nəticə əldə etmək son dərəcə mürəkkəb məsələdir. Azərbaycan isə qarşısına qoyduğu bütün strateji hədəflərə nail oldu və mütləq qələbə qazandı. Bu, müasir hərb tarixində nadir nümunələrdən biridir”.

Dron müharibəsinin yeni modelini Azərbaycan yaratdı

Arzu Nağıyev qeyd edib ki, Vətən müharibəsinin ən çox diqqət çəkən cəhətlərindən biri Azərbaycan Ordusunun müasir texnologiyaları yüksək effektivliklə tətbiq etməsi olub: “Azərbaycan Ordusu Türkiyə və İsrail istehsalı olan pilotsuz uçuş aparatlarını, zərbə dronlarını və digər yüksək texnologiyalı sistemləri vahid əməliyyat konsepsiyası çərçivəsində tətbiq edən ilk ordulardan biri kimi tarixə düşdü. Bu model sonradan dünyanın müxtəlif ölkələrinin hərbi akademiyalarında və ekspert dairələrində öyrənilməyə başlandı. Müharibə zamanı pilotsuz sistemlərin geniş tətbiqi düşmənin canlı qüvvəsinə və hərbi texnikasına ciddi zərbələr vurdu, eyni zamanda Azərbaycan tərəfinin itkilərini minimuma endirdi. Bir çox beynəlxalq ekspertlər Vətən müharibəsini hərb tarixində “dron inqilabı”nın ən uğurlu nümunələrindən biri kimi qiymətləndirirlər. Lakin bütün bunlarla yanaşı, qələbənin əsas müəllifi Azərbaycan əsgəri və Ali Baş Komandan İlham Əliyevdir. Texnologiya vacib amildir, amma qələbəni qazanan peşəkar ordu, düzgün strategiya və milli iradədir”.

Şuşa əməliyyatı müasir urban müharibənin unikal nümunəsidir

Deputatın sözlərinə görə, Vətən müharibəsinin ən parlaq səhifələrindən biri Şuşa əməliyyatı olub: “Şuşanın azad edilməsi təkcə Azərbaycanın deyil, dünya hərb tarixinin ən maraqlı əməliyyatlarından biri hesab olunur. ABŞ hərbi eksperti Con Spenser də öz təhlillərində bu əməliyyata xüsusi yer ayırıb. Şuşa uğrunda döyüşlər yüksək dağlıq ərazidə, mürəkkəb relyef və şəhər mühiti şəraitində həyata keçirildi. Azərbaycan xüsusi təyinatlıları son dərəcə çətin şərtlər altında peşəkarlıq nümayiş etdirərək strateji əhəmiyyətli şəhəri azad etdilər. Müasir urban müharibələrdə belə uğurlu əməliyyatlara nadir hallarda rast gəlinir. Şuşa əməliyyatı gələcəkdə dünyanın aparıcı hərbi məktəblərində öyrəniləcək hərbi nümunələrdən biridir”.

Azərbaycan Ordusu humanizm və peşəkarlıq nümayiş etdirdi

Arzu Nağıyev nəzərə çatdırıb ki, Vətən müharibəsinin fərqləndirici xüsusiyyətlərindən biri də Azərbaycan Ordusunun beynəlxalq humanitar hüquq normalarına ciddi əməl etməsi olub: “Azərbaycan Ordusu yalnız hərbi hədəflərə qarşı mübarizə aparıb. Dinc əhali məqsədli şəkildə hədəfə alınmayıb. Bu, ordumuzun yüksək peşəkarlığının və Azərbaycan xalqının mənəvi dəyərlərinin göstəricisidir. Təəssüf ki, qarşı tərəf mülki yaşayış məntəqələrimizi raket atəşinə tuturdu. Buna baxmayaraq, Azərbaycan Ordusu beynəlxalq hüququn tələblərinə sadiq qaldı. Bu, həm də Silahlı Qüvvələrimizin yüksək nizam-intizamının göstəricisidir”.

Zəfərdən sonra Azərbaycan Ordusu daha da güclənib

Parlamentin komitə sədri qeyd edib ki, 2020-ci ildə əldə edilən qələbədən sonra ordu quruculuğu prosesi dayanmayıb: “Prezident İlham Əliyevin qeyd etdiyi kimi, bu gün Azərbaycan Ordusu 44 günlük müharibədə qələbə qazanmış ordudan daha güclüdür. Bu fikir təsadüfi deyil. Son illərdə həyata keçirilən islahatlar bunu tam təsdiqləyir. Komando briqadalarının yaradılması, xüsusi təyinatlı qüvvələrin genişləndirilməsi, yeni döyüş hazırlığı standartlarının tətbiqi, müasir silah və texnikaların alınması ordumuzun imkanlarını daha da artırıb. Son hərbi paradlarda nümayiş etdirilən yeni texnika və silah sistemləri Azərbaycan Silahlı Qüvvələrinin inkişaf tempini aydın şəkildə göstərir”.

Hərbi təhsil və müdafiə sənayesi yeni mərhələyə qədəm qoyub

Arzu Nağıyev vurğulayıb ki, müasir ordunun əsas şərtlərindən biri güclü hərbi təhsil və inkişaf etmiş müdafiə sənayesidir: “Milli Müdafiə Universitetinin yaradılması və hərbi təhsil sisteminin yenilənməsi gələcək zabitlərin daha peşəkar hazırlanmasına imkan verir. Eyni zamanda, müdafiə sənayesi ilə ordu arasında inteqrasiya gücləndirilir. Bu gün Azərbaycanda müxtəlif növ pilotsuz uçuş aparatları, o cümlədən yerli istehsal olan sistemlər hazırlanır. ‘Zərbə’, ‘Arkan’ və digər layihələr ölkəmizin texnoloji imkanlarının artdığını göstərir. Müdafiə sənayesinin inkişafı Azərbaycanın hərbi müstəqilliyini daha da möhkəmləndirir”.

Xalqın güvənc yeri

Deputat bu gün Azərbaycan Ordusunun xalqın ən çox güvəndiyi dövlət institutlarından biri olduğunu bildirib: “Ordumuz müstəqilliyimizin, ərazi bütövlüyümüzün, suverenliyimizin və gələcək inkişafımızın əsas təminatçısıdır. Azərbaycan əsgəri öz qəhrəmanlığı ilə tarix yazıb, Azərbaycan zabiti peşəkarlığı ilə nümunə göstərib, Ali Baş Komandan İlham Əliyev isə qətiyyətli liderliyi ilə ölkəmizi tarixi Zəfərə aparıb. Əminliklə demək olar ki, Azərbaycan Ordusu bundan sonra da dövlətimizin təhlükəsizliyinin keşiyində dayanacaq, əldə etdiyi Zəfəri qoruyacaq və ölkəmizin milli maraqlarını ən yüksək səviyyədə təmin edəcək”.

Oxşar xəbərlər

Tbilisidə Azərbaycan-Gürcüstan parlamentlərarası əlaqələri müzakirə edilib

Deputat: Saziş Azərbaycan və Somali arasında müdafiə sahəsində yeni mərhələnin başlanğıcıdır

Parlamentin Müdafiə, təhlükəsizlik və korrupsiya ilə mübarizə komitəsinin iclası keçirilib

Arzu Nağıyev: Rusiyanın müxtəlif təxribatlara əl atacağı bəlli idi

MM komitə sədri: Həlak olan minatəmizləyənlərə şəhid statusunun verilməsi barədə təkliflər müsbət qarşılanıb