Trans-Xəzər Beynəlxalq Nəqliyyat Marşrutunda sərhəd prosedurları hələ də ciddi problemlər yaradır.

"Sizinxeber.az" xəbər verir ki, bunu Nəqliyyat İnnovasiyaları Assosiasiyasının (Transport Innovation Association - TIA) İdarə Heyətinin sədri Jurgis Adomavisius Bakıda keçirilən II Xəzər Beynəlxalq Nəqliyyat, Tranzit və Logistika Forumunda bildirib.

"Trans-Xəzər Beynəlxalq Nəqliyyat Marşrutu üzrə müxtəlif ölkələrdə fərqli tənzimləmə qaydaları səbəbindən bir sıra problemlərlə üzləşirik. Həmçinin, təsdiqləmə prosedurları da əlavə çətinliklər yaradır. Bu baxımdan, rəqəmsal izləmə platformaları bizə marşrut boyunca qarşılaşacağımız məsələləri əvvəlcədən müəyyən etməyə və hazırlıqlı olmağa imkan verə bilər. Sistemlərin daha geniş inteqrasiyası və mümkün qədər çox prosesin vahid platformada əhatə olunması yüklərin daha sürətli daşınmasına şərait yaradar. Bu isə müştərilər üçün həm vaxt, həm də maliyyə baxımından əhəmiyyətli üstünlüklər deməkdir", - deyə o qeyd edib.

Sədrin sözlərinə görə, əvvəllər daşımalar əsasən çap olunmuş TIR kitabçaları və CMR sənədləri ilə həyata keçirilib: "Bu gün isə rəqəmsal platformalar sayəsində Bolqarıstan-Türkiyə, Türkiyə-Gürcüstan, Gürcüstan-Azərbaycan sərhədlərində, eləcə də Aktau limanında bizi hansı vəziyyətin gözlədiyini əvvəlcədən görmək mümkündür. Eyni yanaşma Qazaxıstan üzərindən keçən marşrutlara da aiddir. Qazaxıstan-Qırğızıstan və ya Qazaxıstan-Özbəkistan sərhədlərindəki vəziyyət barədə əvvəlcədən məlumat əldə etmək logistikanın səmərəliliyini artırır. Məhz bu səbəbdən belə platformaların yaradılması vacibdir və bu təşəbbüsü yüksək qiymətləndiririk.

Biz də hökumətimizlə birlikdə məlumat mübadiləsinin genişləndirilməsi və proseslərdə vaxt itkisinin minimuma endirilməsi istiqamətində bütün səylərimizi göstərəcəyik. Dəhliz vasitəsilə daşınan yüklərin həcminin artdığını eşitmək sevindiricidir. Bununla belə, marşrut boyunca hələ də həllini gözləyən ciddi problemlər mövcuddur. Təklifim ondan ibarətdir ki, müxtəlif ölkələrdə tətbiq olunan uğurlu təcrübələr öyrənilsin və onların ən effektiv elementləri Trans-Xəzər marşrutunda da tətbiq edilsin".

Oxşar xəbərlər

DLP: "Bir pəncərə" sistemi beynəlxalq ticarət proseslərini vahid platformada birləşdirəcək

Bu il üçün Orta Dəhlizlə yük daşımaları planı və icrası razılaşdırılıb

"CFR Marfă": "Orta Dəhliz" bütün tərəflərə imkanlar, fürsətlər yaradır

Orta Dəhlizlə yük daşımalarının həcmi 63 % artıb

Xəzər bölgəsindən nəqliyyat dəhlizləri… - Ərdoğan